Petropavl polıseıleri skýterler urlady degen kúdikpen buryn sottalǵan eki turǵyndy ustady. Bul týraly Polisia.kz-ke silteme jasaı otyryp Egemen.kz habarlaıdy.
Petropavl qalasynyń turǵyny Birinshi polısııa bólimi qyzmetkerleriniń atyna alǵys aıtty. Qala turǵyny ulynyń týǵan kúnine syılyq retinde skýter satyp alǵan. Alaıda, ol kóp uzamaı qoldy boldy. Tártip saqshylary urlyqty "Izin sýytpaı" ashty. Qalalyq polısııaǵa qalanyń túrli yqsham aýdandarynda bir túnde skýterlerdiń urlanǵany týraly eki aryz kelip túsken. Birinshi polısııa bóliminiń qyzmetkerleri jedel-izdestirý is-sharalaryn júrgizip, nátıjesinde kúdiktiler anyqtaldy jáne ustaldy. Tekserý barysynda olardyń "VAZ-2110" avtokóliginiń aıdap áketilýine jáne basqa da múliktik qylmystarǵa qatysy bar ekeni begili boldy.
Petropavl qalasy PB Birinshi polısııa bóliminiń bastyǵy Tilegen Áljanov naqtylaǵandaı, kúdiktiler qala boıynsha ótkizilgen aýqymdy is-sharalar barysynda áshkerelengen. Kúdiktiler buryn múliktik qylmystar úshin sottalǵan oblys ortalyǵynyń 1990, 1992 jylǵy qala turǵyndary bolyp shyqty. Qazirgi ýaqytta kúdiktiler Petropavl qalasy Polısııa basqarmasynyń ýaqytsha ustaý ızolıatoryna kamaldy. Atalǵan faktiler Sotqa deıingi tergep-tekserýdiń biryńǵaı tizilimine engizildi, tergeý áreketteri júrgizilýde.
Jaýap alý kezinde ustalǵandar skýterlerdiń eshteńemen bekitilmegenin jáne otaldyra almaǵandaryn aıtty. Nátıjesinde, olardy satyp jiberý úshin súırep áketken. Urlanǵan kólikter kúdiktilerdiń biriniń týystarynyń úıiniń aýlasynan tabylyp, ıelerine qaıtaryldy.
Rıza bolǵan turǵyndar saqshylardyń jumysy úshin alǵystaryn aıtýda: "Skýterdi bir aı buryn alǵanbyz. Ańǵaldyǵymyzdyń kesirinen úıdiń aýlasynda qaldyrǵan edik. Bir saǵattan soń shyǵyp edik, tappaı qaldyq. Birden "102" nómirin terdik. Birinshi polısııa bóliminiń qyzmetkerleri tez arada kelip qaldy. Al, kelesi kúni polıseıler bizge qońyraý shalyp, tabylǵanyn aıtyp qýantty. Tipti óz mashınalarymen bizdi skýter tabylǵan jerge jetkizip salyp, qolymyzǵa tabys etti. Qyrýar jumys atqarǵany jáne esh buzylmaǵan qalpynda ózimizge tapsyrǵany úshin olarǵa aıtamyz", deıdi qala turǵyny Aleksandra Ageeva. Polıseıler halyqty múlikterine saq bolýǵa, aıdap áketýge qarsy qurylǵylardy qoldanýǵa, sondaı-aq túngi ýaqytta qos dóńgelekti kólikti beınebaqylaý kameralary bar jerge qoıýǵa keńes beredi.