Almaty oblysynda jyl sońyna deıin barlyq aýdan-qalalarda Servıstik ákimdikter ashylýy tıis. Ázirge mundaı ákimdikter oblystyń 7 aýdanynda bar. Bul týraly búgin sybaılas jemqorlyqtyń aldyn alý máseleleri jónindegi oblystyq vedomstvoaralyq komıssııanyń otyrysynda aıtyldy, - dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Búgingi kúni Aqsý, Balqash, Qarasaı, Qaratal, Kóksý, Raıymbek aýdandary men Taldyqorǵan qalasynda servıstik ákimdikter jumys isteıdi. Olarda qyzmet kórsetetin mekemeler ókilderin bir jerge shoǵyrlandyrý arqyly qyzmet alýdy jeńildetýge múmkindik jasalǵan. Barlyq memlekettik organnyń ókilderi Open space ádisimen ashyq kabınalarda otyryp, kelýshilerge qyzmet kórsetedi.
Degenmen Almaty oblysy boıynsha Sybaılas jemqorlyqqa qarsy qyzmet departamentiniń basshysy Ernar Maqajanov bul týraly óz pikirin bildirip, usynys aıtty:
- Oblys aýmaǵynda búgingi kúni 7 servıstik ákimdik bar. Alaıda bul -respýblıka boıynsha tómengi kórsetkish. Sondyqtan osyndaı ákimdikterdiń barlyq aýdan-qalalarda ashylýyna tapsyrma berýińizdi suraımyn, - dedi E.Maqajanov.
Osydan bir jarym jyl buryn respýblıkada alǵashqy bolyp «Servıstik ákimdik» Qaratal aýdanynda ashylyp, úlgi retinde kórsetilgenin eske alǵan oblys ákimi Amandyq Batalov:
- Barlyq aýdan-qalalarda Servıstik ákimdikter ashýdy jyl sońyna deıin aıaqtaýymyz kerek. Onda qyzmet alýshylar úshin barlyq qolaıly jaǵdaılar jasalatyn bolsyn. Mekemelerge kirý shektelgen qazirgideı kezeńde ár jerge júrigip júrmeı, memlekettik qyzmetterdi bir jerden alatyn osyndaı Servıstik ákimdikter halyqqa asa qajet, - dep atap ótti.
Eske salsaq, 21 tamyzda osyndaı ashyqtyq prınsıpindegi Servıstik ákimdik Ile aýdanynda ashylady dep josparlanyp otyr.