Sý az bolǵanyna qaramastan, Qazsýshar mamandary jergilikti jerlerde barlyq qajetti sharalardy qabyldap, sharýa qojalyqtarynyń alqaptaryn sýarý máselesi jedel sheshimin tabýda.
Bıyl Balqash kóliniń basty sý arterııasy Ile transshekaralyq ózeniniń sý deńgeıiniń tómendigine baılanysty Qapshaǵaı qalasynda Sheńgeldi sýarý alqabynyń aýyz sýy jáne sýarmaly sýy, sondaı-aq Balqash aýdanynyń sýarmaly jerlerin qamtamasyz etý boıynsha kúrdeli jaǵdaı oryn aldy. Osy máseleni sheshý úshin «Qazsýshar» RMK Almaty fılıaly sharýa qojalyqtarynyń jerlerin sýarý úshin uzyndyǵy 1,5 shaqyrym bolatyn qosymsha jetkizýshi kanal-qubyryn saldy. Nátıjesinde Sheńgeldi alqabyn qazir sýarmaly sýmen úzdiksiz qamtamasyz etý júrgizilýde. Sonymen qatar Taldyqorǵanda sýarý jelileriniń qurylysy júrip jatyr, jyl sońyna deıin jobany aıaqtaý josparlanýda. Merdiger – «Monolıt» JShS.
– Oblysta sýarý jaǵdaıyn jaqsartý boıynsha basqa da jumystar júrgizilýde. Máselen, oblystyń Aqsý aýdanynda Islam damý bankiniń qoldaýymen sýarý jelilerin qaıta qurý jumystary júrgizilýde, ony aıaqtaý kelesi jylǵa josparlanyp otyr. Merdiger – «Tamas» JShS. Jobalyq arnalardyń jalpy uzyndyǵy 633 shaqyrymdy quraıdy. Aqsý aýdanynyń 8 aýyldyq okrýginde, onyń ishinde Jansúgirov, Qapal aýyldaryndaǵy Dol kanalynda jumys júrgizilýde. Aqsý aýdanynda sondaı-aq Qyzylaǵash ózenindegi sý qoımasy, sý jınaý toraby jáne magıstraldyq kanaldyń jumysy qaıta qurylyp, tolyq qalpyna keltirilgen. Bógetten Qyzylaǵash aýylynyń egistigine sý beriledi, bul 700 gektar sýarmaly jerdiń sýarý máselesin sheshti. Sý qoımasyna 20 mln tekshe metr sý jınaldy, – deıdi «Qazsýshar» RMK-nyń Almaty fılıalynyń dırektory Smaıyl Kýmetov.
Sondaı-aq Qyzylaǵash alqabynda taǵy da 7 myń gektar jerdi sýarmaly sýmen qamtamasyz etetin sýarý jelilerin salýdyń jańa jobasy ázirlendi. Osy arqyly Qyzylaǵash aýyldyq okrýgindegi sharýa qojalyǵynda taǵy 200 adam jumys isteı alady.
Budan basqa Kóksý bógetinde Kóksý ózeninde aspaly sýarmaly jerlerdiń qurylys-montaj jumystary júrgizilýde, sebebi 1963 jyly paıdalanýǵa berilgen ýaqyttan beri munda birde-bir kúrdeli jóndeý jumystary júrgizilmegen. Merdiger – «Temirbeton» JShS. Joba Jol kartasy sheńberinde júzege asyrylýda, bul jumys jobasyn bıyl aıaqtaý josparlanǵan.
Sondaı-aq Panfılov aýdanyndaǵy Úsek ózenindegi sý torabyn qaıta jańartý jumystary júrgizilýde. Joba Jol kartasy sheńberinde júzege asyrylýda jáne aǵymdaǵy jyly aıaqtaý josparlanyp otyr. Jaqynda sý paıdalaný bóliminiń mamandary Uıǵyr aýdanyna baryp, Sharyn ózeninde de sý azdyǵyn baıqady. Bul jerde sýdy tıimdi paıdalaný boıynsha sheshim qabyldaý úshin sý beketterin jáne sý kanaldarynyń jaı-kúıin tekserý júrgizildi.
Jalpy, bıyl oblys turǵyndaryn sýarmaly sýmen ýaqtyly qamtamasyz etý úshin «Qazsýshar» RMK fılıaly bas qurylystardy, gıdrometrııalyq beketterdi saldy jáne arnalardy mehanıkalyq tazartýdan ótkizip, keıbir jerlerdi betondap, túbin bekitý jumystaryn, sondaı-aq Eskeldi, Alakól, Qaratal, Aqsý, Uıǵyr jáne Panfılov aýdandaryndaǵy kanaldardy jóndeý jumystaryn júrgizdi. Bul óńirde birneshe myń gektar alqapty sýlandyrýdy jaqsartýǵa múmkindik berdi. Sondaı-aq «Qazsýshar» RMK sýdy sıfrly esepke alýdy túpkilikti tutynýshyǵa jetkizý máselesin pysyqtaýda. Bastapqyda qanatqaqty rejimde iske qosý jáne tehnologııalardy synaqtan ótkizý josparlanýda, bul rette osyndaı eseptegishter úshin basty talap olardyń derbestigi jáne derekterdi qashyqtan berý.