«Bavarııa» Chempıondar lıgasynyń jartylaı fınalynda fransýzdyń «Lıon» komandasynan basym túsip, fınalda taǵy bir fransýz klýby PSJ-nyń qarsylasy atandy, dep habarlaıdy Egemen.kz tilshisi.
Portýgalııanyń Lıssabon qalasyndaǵy «Joze Alvalade» stadıonynda ótken match 3:0 esebimen aıaqtaldy. 18-shi jáne 33-shi mınýttarda Germanııa quramasynyń shabýylshysy Serj Gnabrı dýbl avtory atansa, 88-shi mınýtta polıak shabýylshysy Robert Levandovskı gol soǵyp, oıynnyń núktesin qoıdy.
Jartylaı fınalǵa deıin «Bavarııa» «Chelsıdi» (3:0, 4:1) men «Barselonany» (8:2) joldan taıdyrsa, «Lıon» «Iýventýs» (1:0, 1:2) pen «Manchester Sıtıdi» (3:1) artta qaldyrǵan edi.
«Bavarııanyń» fınaldaǵy qarsylasy PSJ jartylaı fınalda nemis «RB Leıpsıgti» (3:0), «Atalantany» (2:1) jáne Dortmýndtyń «Borýssııasyn» (1:2, 2:0) jeńgen bolatyn.
Fınal 23 tamyzdan 24 tamyzǵa qaraǵan túni Nur-sultan ýaqytymen 00:50-de «Eshtadıý da Lýshta» stadıonynda ótedi.
«Bavarııa» úshin aldaǵy fınal tarıhta 11-shi, al PSJ úshin – birinshi bolmaq. Mıýnhendikter buǵan deıin bes ret Chempıondar lıgasynyń jeńimpazy atandy. Olar kýbokty sońǵy ret 2013 jyly basynan kótergen edi.
Statıstıka:
«Lıon» – «Bavarııa» 0:3
Serj Gnabrı 18, 33, Levandovskı 88.
Dopty ıelik etý – 36% – 64%; soqqy – 9:20; dál soqqy – 3:9; buryshtama – 4:6; ofsaıd – 1:3; sary qaǵaz – 3:0; oıynshy almastyrý – 5:5.
«Lıon»: qaqpashy – Lopesh; qorǵaýshylar – Markal (Sherkı), Marselo, Denaıer; jartylaı qorǵaýshylar – Korne, Aýar, Brýno (Mendes), Kakere, Dıýbýa (Tete); shabýylshylar – Ekambı (Reıne), Depaı (Dembele).
«Bavarııa»: qaqpashy – Noıer; qorǵaýshylar – Kımmıh, Boateng (Zıýle), Alaba, Devıs; jartylaı qorǵaýshylar – Alkantara (Tolısso), Goretska (Pavar), Perıshıch (Koman), Gnabrı (Koýtıno); shabýylshylar – Mıýller, Levandovskı.