Almatyda ótip jatqan bokstan XVII álem chempıonaty óziniń sheshýshi kezeńine kelip jetti. Burnaǵy kúni oınalǵan shırek fınaldyq jekpe-jekterdiń qorytyndysynda júldegerlerdiń esimderi túgel anyqtaldy. Endigi másele kimniń qandaı tústi medal alatynyn naqty anyqtaýǵa qarap tur. Búgin sharshy alańdy shaıqaıtyn jartylaı fınaldyq shaıqastar sol joldaǵy birinshi qadam bolmaq.
Almatyda ótip jatqan bokstan XVII álem chempıonaty óziniń sheshýshi kezeńine kelip jetti. Burnaǵy kúni oınalǵan shırek fınaldyq jekpe-jekterdiń qorytyndysynda júldegerlerdiń esimderi túgel anyqtaldy. Endigi másele kimniń qandaı tústi medal alatynyn naqty anyqtaýǵa qarap tur. Búgin sharshy alańdy shaıqaıtyn jartylaı fınaldyq shaıqastar sol joldaǵy birinshi qadam bolmaq.
Qazaqstan quramasy osy kúnderi óziniń tarıhynda eshqashan bolmaǵan zor jetistikterge jetti. Bylǵary qolǵap sheberleriniń jahandyq jarysynda bizdiń sańlaqtardyń 8 birdeı medalge qol jetkizgen kezi buryn-sońdy bolǵan emes. Biz kúni erteń bulardyń qanshasynyń altyn men kúmis bolyp jikteletinin dál bilmeımiz, biraq, búgingi asyp otyrǵan asýdyń ózi tolaǵaı tabys bolyp tabylady. Osy kezge deıin álemdik dodada 8 jáne odan da kóp medaldar saltanatyna Kýbadan basqa birde-bir eldiń quramasy jetip kórgen joq. Al, Reseıdiń jetken jetistigi eki ret 7 medaldyń aýqymymen ólshenedi.
Endi osynyń mysalyn Qazaqstannyń óz shejiresinen keltirer bolsaq, bizdiń respýblıkamyz táýelsizdik alǵaly bergi aralyqta eń myqtaǵanda 5 medalǵa qol artqanyn baıqar edik. Ony 2005 jyly Qytaıdyń Mınıang qalasynda ótken birinshilikte tirkedik. Budan da ári ketsek, elimiz quramasy ózi birinshi ret qatysqan, 1993 jyly Fınlıandııanyń Tampere qalasynda ótken VII jahan jarysynan 1 ǵana qola medal alyp qaıtqanyn aıtar edik. Sosyn 1995 jyly Berlınde 1 kúmis, 1 qola medaldy olja sanadyq. 1997 jyly Vengrııanyń astanasy – Býdapesht shaharynda da sol kórsetkishti qaıtaladyq. 1999 jyly AQSh-tyń Hıýston qalasynda birinshi ret altyn medalǵa qol jetkizip, onyń janyna 1 kúmis, 1 qola medaldy qosa aldyq. 2001 jyly Irlandııanyń Belfastynda jalǵyz kúmis medaldy qanaǵat tuttyq. 2003 jyly Taıland ortalyǵy – Bangkok qalasynda 2 altyn medaldy moıynǵa taqtyq. 2007 jyly AQSh-tyń Chıkago qalasynda 1 altyn, 2 qola medalǵa shamamyz jetti. 2009 jyly Italııanyń Mılanynda jalǵyz qola medalǵa kúnimiz qarady. Al 2011 jyly Bakýde 2 kúmis, 2 qola medalmen Hazar teńiziniń bergi betine óttik.
Mine, osylardyń qaı-qaısysymen salystyrǵanda da, kórsetkishtiń kórnekti ekeni kózge uryp tur. Quramanyń Myrzaǵalı Aıtjanov bastaǵan jattyqtyrýshylar alqasy bul alynyp otyrǵan bıik belestiń tekten-tek kelmegenin osydan eki aı buryn Iordanııanyń astanasy – Amman qalasynda ótken Azııa birinshiliginde 7 altyn, 1 kúmis medaldarymen-aq tolyq dáleldep qoıǵan. Qazaqstan quramasynyń bul chempıonatta basqalardan aıdyny ozyq, aıbyny artyq ekenin taǵy myna naqty kórsetkishterden baıqaýǵa bolady. Álemdegi eń myqty boks derjavalary sanalatyn eki el – Kýba men Reseıdiń árbiri jartylaı fınalǵa, ıaǵnı medaldar aýylyna bar-joǵy tórt-tórtten ǵana ókilderin endire aldy. Osy saptaǵy 40 boksshynyń sondaı-aq 3-ýi Ázerbaıjan men Italııa elderinen bolyp otyr. Al Irlandııa, Germanııa, О́zbekstan jáne Brazılııa syndy elderdiń úlesteri 2 boksshydan aspaı qaldy. Bulardan bólek, Kosta-Rıka, Ýels, Taıland, Ýkraına, Mońǵolııa, Venesýela, Armenııa, Anglııa jáne Argentına sekildi memleketter quramalarynda bir-bir atletten ǵana bar.
Biz budan buryn chempıonatqa 111 elden 457 boksshy kelgenin aıtqan bolatynbyz. Solardyń arasynda sońǵy Olımpııalyq oıyndardyń 1 chempıony, 4 kúmis júldegeri, 11 qola júldegeri boldy. Buǵan qosa, sońǵy álem birinshiliginiń 5 chempıony, 4 kúmis júldegeri, 11 qola júldegeri keldi. Budan bólek, bıyl ǵana Eýropanyń chempıony atanǵan 7 sańlaq pen Azııada top jarǵan 9 tuıǵyn osy chempıonattyń jalynyna jalyn qosýǵa atsalysty.
Sonymen, búgin – jartylaı fınal. Aqtyq aıqasqa kimderdiń baratynyn anyqtaıtyn bul saıystyń ońaı bolmaıtynyn qazirden shamalap otyrmyz. Sebebi, kúni keshe ótken shırek fınaldaǵy jan alyp, jan berisken is-qımyldar aldaǵy aıqastyń sodan da qaýyrt bolatynyn baıqatqandaı. Boksshylar ózderiniń tarıhyndaǵy birinshi ret shlemsiz ótip jatqan iri halyqaralyq jarystarynda shynynda baryn salyp jatyr. Bokstyń ózine tán ádemiligin tanytatyn bul ereje olarǵa da unaǵandaı.
«Egemen Qazaqstannyń» álem chempıonatyndaǵy
kóshpeli redaksııasy.