Jumyr jerdiń betin jaman tumaý jaılaǵaly janazanyń jamaǵatsyz ótkizilýi jalpaq jurttyń qabyrǵasyna batyp turǵandyǵy ámbege aıan. Osy bir qalyptasqan dástúrdi ımandy ıshara qylyp ótkizýdiń de joly bar eken.
Taıaýda oblys ortalyǵyndaǵy Naýan haziret atyndaǵy meshit uıymynyń uıytqy bolýymen Mereke Orazuly esimdi el aǵasynyń ómirden ótkenine qyryq kún tolýyna oraı sol kisiniń atynan marqumnyń otbasy 100 muqtaj otbasyna azyq-túlik paketteri taratty. Bul ıgilikti isti meshit qyzmetkerleri uıymdastyryp, áleýmettik jaǵynan az qamtylǵan otbasylardyń úılerine jetkizip berip, saýapty is jasady.
Qazirgi ýaqytta meshitterde rásimderdiń ýaqytsha toqtatylǵandyǵy kópshilikke belgili. Áıtse de, qaıyrymdylyq qaǵıdattary júzege asa bermek.
– Mundaı ıgilikti sharalar aldaǵy ýaqytta da jalǵasatyn bolady, – deıdi meshittiń bas ımamy Qýanysh Sábıt, – ázirshe ómirden ótken adamdardyń jetisi, qyrqy, jyly deıtuǵyn ejelden qalyptasqan rásimderdi osylaı atqarsaq, saýaby zor bolmaq.
Basqa amaldyń joqtyǵynan árıne. Esesine mundaı sharalar el ishinde juqpaly aýrýdyń jolyn kesýge septigin tıgizetindigi anyq. Buryn qysylyp-qymtyrylyp, kisi sanyn shektep as bergenniń ózinde jaǵasynan jaman tumaý úńilip qarap turatyndaı áserde bolatyn jamaǵat úshin jap-jaqsy mysal bolatyn-aq shara.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.