Fransııa men Germanııa ustanymy boıynsha Dúnıejúzilik densaýlyq saqtaý uıymyn qarjylandyrýdy jarna esebinen ulǵaıtýdy jón kóredi. Bul týraly Reuters aqparatyna súıene otyryp Egemen.kz habarlaıdy.
Kári qurlyqtaǵy Germanııa men Fransııa bıligi DDU-na múshe elderdiń jarna tóleýimen onyń qarjylyq myǵymdyǵyn nyǵaıtý kerek dep esepteıdi. "Pandemııa bastalmas buryn DDU-nyń qarjylyq múmkindiginiń keń adym ashtyrmaıtyny belgili bolǵan edi" degen eki el bıligi, bul oıdy DDU-ny reformalaý týrasynda dıplomattar arasynda taratqan qujatta kórsetken. Jeti betten turatyn DDU-ny reformalaý týrasyndaǵy qujatta uıymnyń ókilettiligin keńeıtýmen qatar qarjylyq qoldaý qajettigi basa aıtylypty.
Búginde DDU-nyń eki jyldyq jalpy bıýdjeti 5 mlrd quraıdy, al onyń besinshi bóligin oǵan múshe-elder eshqandaı shartsyz túrde jarna esebinde aýdaryp keledi. Al qalǵan bóligi turaqty emes, negizinen maqsatty túrde, bir rettik nemese memleketter erikti jaǵdaıda tólep turatyn qarajattan quralady. Bul DDU jumysyn órkendetýge qolbaılaý, sondyqtan turaqty jarna qajet degen pikir aıtylǵan.
Qujat avtorlary COVID-19 tárizdi álemge qaýip tóndiretin aýrýlardyń aldyn alý, oshaqtaryn anyqtaý, jáne olarmen kúreste qazirgiden kóbirek qarajat kerektigin kórip otyrǵanyn aıtyp, bul oıdy "Vashıngton men Beıjińge deıin qoldaý qajettigin", onyń adamzat ıgiligine jumys isteıtinin kórsetken.
Reuters málimetine sensek DDU-ny reformalaý jaıyndaǵy áńgime qyrkúıek aıynyń ózinde kóterilýi múmkin eken.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.