Keleli máseleler kóterilgen keńes

Keshe Qazaqstan Prezıdenti Nursultan Nazarbaev Belarýs astanasynda uıymdastyrylǵan Joǵary Eýrazııalyq ekonomıkalyq keńeske qatysty. Al búgin Táýelsiz Memleketter Dostastyǵy memleket basshylary keńesine qatysatyn bolady.

Belarýs astanasy halyqaralyq deńgeıdegi eki birdeı aýqymdy sharany ótkizýge jan-jaqty ári tyńǵylyqty daıyndalypty. Mınskiniń kóshelerine joǵary deńgeıdegi jıyndardyń ótetinin aıǵaqtaıtyn bılbordtardyń ilinýinen de muny anyq ańǵarýǵa bolady. Al Joǵary Eýrazııalyq ekonomıkalyq keńeske jáne TMD-ǵa múshe memleket basshylarynyń keńesine keler bolsaq, saıası mańyzy zor oqıǵalardy nasıhattaý úshin 200-ge tarta BAQ ókili arnaıy tirkeýden ótken eken.

Keshe Qazaqstan Prezıdenti Nursultan Nazarbaev Belarýs astanasynda uıymdastyrylǵan Joǵary Eýrazııalyq ekonomıkalyq keńeske qatysty. Al búgin Táýelsiz Memleketter Dostastyǵy memleket basshylary keńesine qatysatyn bolady.

Belarýs astanasy halyqaralyq deńgeıdegi eki birdeı aýqymdy sharany ótkizýge jan-jaqty ári tyńǵylyqty daıyndalypty. Mınskiniń kóshelerine joǵary deńgeıdegi jıyndardyń ótetinin aıǵaqtaıtyn bılbordtardyń ilinýinen de muny anyq ańǵarýǵa bolady. Al Joǵary Eýrazııalyq ekonomıkalyq keńeske jáne TMD-ǵa múshe memleket basshylarynyń keńesine keler bolsaq, saıası mańyzy zor oqıǵalardy nasıhattaý úshin 200-ge tarta BAQ ókili arnaıy tirkeýden ótken eken.

Keshe eki aýqymdy sharanyń alǵashqysy, ıaǵnı Joǵary Eýrazııalyq ekonomıkalyq keńestiń otyrysy Mınskide jańadan boı kótergen Táýelsizdik saraıynda ótti. Eýrazııalyq ıntegrasııany damytý jáne Joǵary Eýrazııalyq ekonomıkalyq keńestiń kókjıegin keńeıtýdi maqsat tutqan otyrys aıasynda kún tártibine birneshe másele qoıyldy. Olardyń birinshisi – ıntegrasııany damytýdyń negizgi baǵyttary jáne Eýrazııalyq ekonomıkalyq odaq týraly kelisim jobasyn ázirleý barysy týraly bolsa, ekinshisi – Erkin saýda aımaǵyn qurý týraly kelisim tóńireginde órbidi. Buǵan qosa, keńes sheńberinde Armenııanyń Keden odaǵyna kirý týraly ótinishi, «Básekelestik týraly» modeldi zań, Keden odaǵy aýmaǵyndaǵy esirtki máselesin júıeleý, Eýrazııalyq ekonomıkalyq komıssııanyń 2012 jylǵy bıýdjetiniń oryndalýy týrasyndaǵy jyldyq esebi, sondaı-aq, Eýrazııalyq ekonomıkalyq keńes pen Eýrazııalyq ekonomıkalyq komıssııa músheleriniń, olardyń otbasylarynyń ózderi jarııa etken kiristeri, materıaldyq ıgilikteri týraly bergen aqparattarynyń rastyǵyn tekserý jónindegi erejeni bekitý sekildi máseleler qaraldy.

Joǵary Eýrazııalyq ekono­mıkalyq keńes – Keden odaǵy men Birtutas ekonomıkalyq keńistiktiń eń joǵary úılestirýshi organy. Bul keńeske osy uıymǵa qatysatyn memleket jáne úkimet basshylary tolyqtaı múshe. Keńestiń birden-bir mindeti uıymnyń atqarýshy organy sanalatyn komıssııa usynǵan qujattardy bekitý bolsa, memleket nemese úkimet basshylary deńgeıinde bekitiletin bul qujattar arasynda halyqaralyq kelisimderdiń jobalary jáne basqa da ıntegrasııalyq úderisti tereńdetýge baǵyttalǵan qujattar túgeldeı derlik qam­ty­lady. Keńestiń sharty boıyn­sha qujattardyń jobalaryn ázirleıtin komıssııa quramyna múshe memleketterden bir-bir ókilden engen. Olarǵa qoıylar talap ta erekshe. Sebebi, komıssııa quramyna kirgen azamattardyń ókilettigi premer-mınıstrdiń orynbasary deńgeıinde bolýy tıis.

Joǵary Eýrazııalyq ekono­mıkalyq keńestiń sońǵy otyrysy byltyrǵy jyldyń jeltoqsanynda memleket basshylarynyń deń­geıinde júzege asqan bolatyn. Sol otyrysta prezıdentter 2013 jyly úsh márte kezdesýge ýaǵdalasqan edi. Sondyqtan da, bıylǵy jyl­dyń alǵashqy otyrysy 29 mamyr kúni Astanada ótti. Sol kezdegi basqosýdy ashqan Elbasy Nursultan Nazarbaev eýrazııalyq keńistiktegi ıntegrasııanyń pers­pektıvasy ár memleket úshin mańyzdy ekendigin, endeshe, ıntegrasııa úderisteri barlyq tarapqa birdeı tıimdilikpen tereńdeı túsýi qajettigin málimdegen bolatyn. Mundaǵy aıtar oı, kózdegen maqsat bireý – ol derbes memleketter ózara yqpaldastyqqa umtylatyn bolsa, bul qurylymnyń tıimdiligi men múmkindikterin bir memleket qana emes, barshasy birdeı sezinýi kerek.

Sol jıyn barysynda Qazaqstan Prezıdenti: «Memleketter ınte­gra­sııaǵa jeke-dara, oqshaýlanyp qol jetkize almaıtyn dúnıeni ıelený úshin barady, al mundaı jaǵdaıda yqpaldasý úderisi evo­lıýsııalyq jolmen, satylap júzege asqany abzal. Biz óz kúshterimizdi biriktirgende ortaq múddege qol jetkizýdi kózdep, bul isti kezeń-kezeńmen atqarýǵa tıispiz. Búginge deıin biz osy jolmen júrip, aldymen Keden odaǵyn qurdyq, odan Birtutas ekonomıkalyq keńistikti qurýdy aıaqtaýǵa jaqyndadyq. Aldymyzda Eýrazııalyq ekonomıkalyq odaq qurý kezeńi tur», degen edi.

Demek, Joǵary Eýrazııalyq ekonomıkalyq keńestiń búgingi mindeti Keden odaǵy men Birtutas ekonomıkalyq keńistikti odan ári damytý perspektıvasy bolsa, bolashaqtaǵy mindeti – Eýrazııalyq ekonomıkalyq odaq qurý. Sol sebepti de, memleket basshylary buǵan deıin tuspaldanyp kelgen Eýrazııalyq ekonomıkalyq odaq qurýdyń merzimine qatysty túpkilikti sheshimderin jarııa etken-tin. Memleket basshylary belgilegen mejege sáıkes, Eýrazııalyq ekonomıkalyq odaq 2015 jyldyń 1 qańtarynan bas­tap iske qosylýy tıis. Ol úshin 2014 jyldyń 1 mamyrynda memleket basshylarynyń qaraýyna Odaqtyń qurylýy jónindegi qujattardyń sońǵy nusqasy usynylýy qajet. Bul arqyly ıntegrasııanyń kelesi satysyn qurýdyń negizderi qalanyp, Keden odaǵyna múshe memleketter 2015 jyly Eýrazııalyq ekonomıkalyq odaqqa erkin qadam basa alady.

Mınsk tórinde uıymdasty­ryl­ǵan Joǵary Eýrazııalyq eko­nomıkalyq keńes otyrysy aıasynda, mine, osy máselelerdi, onyń ishinde aımaqtyq ıntegra­sııa­ny damytýdyń negizgi baǵyt­ta­ry syndy jáıtter jan-jaqty súzgiden ótkizildi. Osy sebepti, kún tártibinde, eń aldymen, Eýr­azııalyq ekonomıkalyq odaq týraly kelisim jobasyn ázirleý barysy talqy tarazysyna salyndy.

Joǵary Eýrazııalyq ekono­mı­kalyq keńesiniń jıyny Qazaqstan, Belarýs jáne Reseı memleketteri basshylary deńgeıindegi shaǵyn quramdaǵy otyryspen bastaldy. Otyrysta alǵashqy sózdi tór ıesi – Belarýs Prezıdenti Aleksandr Lýkashenko aldy. Ol óz sózinde kún tártibinde eýrazııalyq ıntegrasııa­ny damytý baǵyttary boıynsha mańyzdy máseleler turǵanyn jetkizdi. Búgingi otyrystyń negizgi máselesi – Eýrazııalyq ekonomıkalyq odaq qurý jónin­degi kelisimdi daıyndaý. Bul úde­ris bizdiń memleketterimizdiń ıntegrasııalyq baǵytta damýyn jedeldetý úshin aıryqsha ma­ńyzdy. Al Eýrazııalyq ekono­mıkalyq keńistik bizdiń mem­leketterimizdiń damýyna aı­tarlyqtaı dárejede yqpal etýi úshin onyń arhıtektýrasyn da myqtap qolǵa alýymyz kerek. Demek, biz buǵan yqpal ete­tin jumys tetikterin retke kel­tirip, jandandyrǵanymyz jón. Biz óz memleketterimizdiń tá­ji­rı­besimen bólisip jatyrmyz.

Al bizdiń qabyldaǵan sheshimderimiz Eýrazııalyq ekonomıkalyq keńistiktiń barlyq aýmaǵynda birdeı oryndalýy tıis. Belarýs Keden odaǵyna jańa memleketterdiń múshe bolǵanyn quptaıdy. Sebebi, mundaı úderis Keden odaǵynyń irgesin nyǵaıta túsedi. Sol sebepti, bizdiń uıymnyń esigi basqa elderge árdaıym ashyq. Al bul uıymǵa múshe bolýǵa nıet tanytyp otyrǵan Armenııa sekildi elderge Qazaqstan, Reseı, Belarýs memleketteri júrip ótken jolmen júrýi qajet dep oılaımyn. Al Ýkraınaǵa keler bolsaq, bul memleket Keden odaǵynan da, bolashaqta Eýrazııalyq ekonomıkalyq odaqtan da irgesin ajyratpaǵany durys. Árıne, bulardyń barlyǵy kúrmeýli máseleler. Demek, biz bolashaqta da ózimizdiń qandaı baǵytta damýymyzdy aıqyndap otyrýymyz kerek, dedi A. Lýkashenko.

Kelesi kezekte sóz alǵan Qazaqstan Prezıdenti Nursultan Nazarbaev keńes otyrysyna qatysýshylarǵa kórsetken qonaqjaılyǵy úshin Belarýs memleketine, Prezıdentine alǵysyn bildirdi. Bizdiń búgingi basqosýymyz árqaısymyz úshin óte mańyzdy. Búginde ıntegrasııa­syz alǵa qadam basý múmkin emes. Sebebi, qandaı da bir memleket bolsyn ózara yqpaldastyq ornatpaıynsha, birlese is-qımyl jasamaıynsha, óz memleketin alǵa jyljyta almaıdy. Biz memleketterimizdiń ortaq birlestiginiń mańyzdy tustary jóninde kóp ret aıttyq. Bizdiń elderimizdiń arasyndaǵy taýar aınalymy sońǵy ýaqytta azaıdy. Muny eksporttyń álemdik deńgeıdegi negizgi taýarlar baǵasynyń tómendeýimen baılanystyrýǵa bolady. Biraq, budan eshqandaı qıyndyqty kórýge bolmaıdy dep oılaımyn, dedi Qazaqstan basshysy.

Sondaı-aq, N.Nazarbaev búgingi tańda memleketter aldynda turǵan ózekti máselelerdi attap ketpeı, olardy birtindep sheshýdiń joldaryn qarastyrý qajettigin atap ótti. Biz úshin sheshilýi tıis mańyzdy másele – kedendik prosedýralardy meılinshe jeńildetý. Biz qurǵan Eýrazııalyq ekonomıkalyq komıssııanyń jumysy ózara taýar aınalymyn jandandyrý, kez kelgen kedergilerdi joıý baǵyttarynda jumys isteýi tıis. Árıne, qandaı da bir problema týyndamaı qoımasy anyq. Biraq, ony sheshý úshin Eýrazııalyq ekonomıkalyq komıssııa, onyń músheleri bar. Sondyqtan, olar bir ústel basyna otyryp, kez kelgen kúrmeýli máselelerdi birlese sheshýi tıis. Eýrazııalyq ekonomıkalyq komıssııa – Keden odaǵy men Birtutas ekonomıkalyq keńistik aıasyndaǵy jumystardy úılestirý maqsatynda qurylǵan mańyzdy organ. Onyń taǵy bir mindeti – memleketter arasyndaǵy yntymaqtastyqty damytýdyń jańa joldaryn qalyptastyrý, dedi N. Nazarbaev.

Osylaı deı kele, Qazaqstan Prezıdenti bul baǵyttarda jańa usynystar kelip jatqanyn, alaıda, Keden odaǵyna, eýrazııalyq ıntegrasııaǵa qatysty kún tártibinde turǵan ózekti máselelerdi sheshpeı turyp, basqa máselelerdi qolǵa alý qısynǵa kelmeıtinin jetkizdi. Komıssııa bul máselelerdiń barlyǵyn, olardyń júzege asyrylý ýaqytyn retke keltirip otyrýy tıis, dedi Qazaqstan basshysy bul oraıda.

О́ziniń sózinde Qazaqstan Prezıdenti, sonymen qatar, Eýrazııalyq ekonomıkalyq odaq qurý máselesi basty nazarda turǵanyn atap ótti. 2015 jyldyń 1 qańtarynan bastap Eýrazııalyq ekonomıkalyq odaq qurylatyn bolady. Keler jyldyń mamyr aıynda biz Eýrazııalyq ekonomıkalyq odaqqa qatysty barlyq máselelerdi birlese otyryp qarastyryp, bir sheshimge, toqtamǵa kelýimiz kerek. Bizdiń aldymyzda turǵan sheshimder eki túrli bólikten turady. Biz Astanada ótken jıyn kezinde bul týraly kelisken bolatynbyz. Olar – ınstıtýttyq jáne ekonomıkalyq. Biz kez kelgen máseleni sheshýge kezeń-kezeńmen kelýimiz kerek. Eger memleket basshylary bir máseleni sheshetin bolsa, komıssııa sol máselelerdi oryndaýdy qadaǵalaýy qajet. Iаǵnı, memleket basshylary qol qoıǵan kelisimderdiń barlyǵy oryndalýy kerek. Eger, qandaı da bir másele týraly qıyndyqtar týyndap jatsa, komıssııa olar týraly bizdi habardar etip otyrýy tıis. Negizgi talap – kezdesken túıtkildi máseleni sheship alyp baryp alǵa jyljyp otyrý. Máselen, biz munaıdy jáne gazdy tasymaldaý jóninde kelisken edik, biraq ol áli de oryndalmaı otyr. Temir jol tarıfteri, elektr energııasy máseleleri de sheshilmeı keledi. Sondyqtan, aqyry bul máseleler týraly kelisimge kelgen ekenbiz, endi solardy oryndaıyq. Basqa máseleni kún tártibine shyǵarmas buryn osylardy oryndaıyq. Bizdi kim asyqtyryp otyr? Ýaqyt bar. Biz memleketterimiz arasyndaǵy kapıtal, jumys kúshi týraly máselelerdi bir júıege keltirdik. Endi taýar aınalymyna qatysty kedergilerdi sheshý baǵytynda jumys jasaýymyz kerek, dedi N.Nazarbaev.

Sondaı-aq, Qazaqstan Prezıdenti qazirgi tańda erkin taýar aınalymy básekelestiktiń jaǵdaıy men tetikterin qıyndatyp jibergenin, bul máseleni iri ınvestısııalyq jobalardy qolǵa alý arqyly sheshýge bolatynyn jetkizdi. N.Nazarbaev, sonymen qatar, memleketter aldynda turǵan Keden odaǵy máselesin, ıntegrasııaǵa qatysty kez kelgen kedergilerdi ortaq ustanymǵa kelý negizinde sheshý qajettigin, Armenııanyń Keden odaǵyna qosylý jónindegi ótinishine qatysty Qazaqstan óz usynysyn engizgenin de aıtyp ótti.

Otyrys aıasynda sóılegen sózinde N.Nazarbaev Qazaqstannyń Búkilálemdik saýda uıymyna kirý máselesine de toqtaldy. Ol úshin Qazaqstan men Reseıdiń Búkilálemdik saýda uıymyna múshe memleketter aldyndaǵy mindetteri úılesim tabýy qajet. Qazaqstan BSU-ǵa Eýrazııalyq ekonomıkalyq odaq qurylmaı turyp kirýge nıettenip otyr. Sebebi, Búkilálemdik saýda uıymyna múshe memleketter buǵan deıingi qol jetkizilgen kelisimderdi qaıta qarastyryp, nátıjesinde bizdiń elderimizdiń BSU-ǵa kirýimiz kesheýildep ketýi múmkin. Sol sebepti bul máseledegi konstrýktıvti ustanym Qazaqstannyń BSU-ǵa ótýin tezdetip, Keden odaǵy men Eýrazııalyq ekonomıkalyq keńistik jumysynyń úzilmeýine yqpal eter edi, dedi N.Nazarbaev.

Reseı Prezıdenti Vladımır Pýtın búginde Eýrazııalyq ekonomıkalyq keńistiktiń quqyqtyq-normatıvtik bazasy myqtap qalyptasqanyn, bolashaqta bul baǵytta júıeli jumystar júrgizý qajettigin atap ótti. Búgingi kelissózimiz biz budan keıin qalaı alǵa qaraı jyljýymyz qajettigin taǵy bir aıqyndap berdi dep oılaımyn. Búginde Keden odaǵy men Eýrazııalyq ekonomıkalyq keńistik formatyna sáıkes keletin ıntegrasııa sapasynyń artqanyn atap ótýge bolady. Eýrazııalyq ekonomıkalyq keńes erkin taýar aınalymyn, erkin qyzmet túrlerin, erkin kapıtal men jumys kúshin qamtamasyz etýge jumys isteýi qajet. Biz energetıka, kólik, telekommýnıkasııa salalary boıynsha eýrazııalyq júıeni qurýdy qolǵa alýymyz kerek. Bul bizdiń elderimiz ekonomıkalarynyń damýyna yqpal etedi. Jalpy alǵanda, búginde barlyq elder ıntegrasııa jolymen júrip keledi. Sebebi, ıntegrasııa ishki resýrstardy paıdalanýdy jáne olardyń ósimin qamtamasyz etedi. Biz óz memleketterimizdiń álemdik naryqtaǵy básekelestigin arttyrýdy oılaýymyz kerek. Sebebi, biz birge kúsh biriktirgende myqty bolamyz jáne kezdesken ǵalamdyq qıyndyqtarǵa qarsy tura alamyz. Sońǵy 3 jyl ishinde Keden odaǵy óziniń tıimdiligin kórsetip berdi. Bizdiń kásiporyndarymyzdyń arasyndaǵy baılanystarymyz nyǵaıýda. Eksportymyzdyń kólemi de ulǵaıyp keledi. Máselen, Keden odaǵynyń syrtqy naryqtaǵy taýar aınalymy kún sanap qarqyn alýda. Sońǵy 8 aı ishinde bul kórsetkish 604 mlrd. dollardy qurady. Búginde Keden odaǵyna álemdegi ekonomıkasy myqty elderdiń biri Úndistan da qyzyǵýshylyq tanytyp otyr. Jaqynda Úndistannyń premeri meniń búgingi ótip jatqan jıynda Keden odaǵymen erkin taýar aınalymyn júrgizý jónindegi kelisimge olardyń qatysý múmkindigin kún tártibine qoıýymdy surady. Men Úndistan naryǵynyń álemdik ekonomıkadaǵy ornyn eskere otyryp, bul máseleni nazarda ustaý qajet dep esepteımin. Al qazirgi tańdaǵy álemdik ekonomıkanyń jalpy qarqynynyń báseńdeýin eskere otyryp, bizdiń «úshtigimizdiń» kórsetkishi qanaǵattanarlyq, kóńil qýantarlyq deńgeıde dep oılaımyn. Máselen, Keden odaǵy men Eýrazııalyq ekonomıkalyq keńistik aıasyndaǵy taýar aınalymy qańtar-tamyz aılarynda 2 paıyzǵa kóterildi. Árıne, álemdik ekonomıkanyń daǵdarysy bizdiń elderimizdi de aınalyp ótken joq. Bul qıyndyqtardan shyǵý úshin biz ıntegrasııany odan ári tereńdete túsýimiz kerek. Taýar men qyzmetterdiń ortaq naryǵyn, bıznestiń tetikterin jandandyryp otyrýymyz qajet. Reseı osyndaı baǵyt ustanǵandy qalaıdy, dedi V. Pýtın.

Qazaqstan, Reseı jáne Belarýs memleketteri basshylarynyń 2 saǵatqa sozylǵan shaǵyn quramdaǵy otyrysyna budan keıin Qyrǵyzstan, Ýkraına, Armenııa jáne Tájikstan memleketteri basshylary kelip qosyldy. Joǵary Eýrazııalyq ekonomıkalyq keńestiń bul otyrysyna Keden odaǵyna múshe memleketter basshylarynyń eýrazııalyq ıntegrasııaǵa, ony damytý joldaryna qatysty aıtqan pikirleri men usynystary qaıta qaralyp, talqydan ótti.

Joǵary Eýrazııalyq ekono­mıkalyq keńes otyrysynyń qorytyndysynda Qazaqstan, Belarýs, Reseı basshylarynyń qatysýymen jýrnalısterge arnalǵan baspasóz máslıhaty ótti. Onda sóz alǵan Belarýs Prezıdenti A.Lýkashenko jıyn barysynda Eýrazııalyq ekonomıkalyq odaq qurýǵa baılanysty naqty usynystar aıtylyp, sheshimin tappaı júrgen máselelerdi qaıta qarastyrýǵa aıryqsha nazar aýdarylǵanyn atap ótti. Jıyn barysynda qyzý pikirtalas júrdi. Bul pikirtalastardyń barlyǵy eýrazııalyq ıntegrasııany damytýǵa, Birtutas ekonomıkalyq keńistik aıasyn keńeıtýge yqpal etedi dep oılaımyz. Biz Armenııanyń Keden odaǵyna qosylý týraly ustanymdary men ótinishterin qýattaımyz. Iаǵnı, biz kez kelgen memlekettiń Keden odaǵyna kirý nıetin qoldaımyz. Sebebi, bulardyń barlyǵy Joǵary Eýrazııalyq ekonomıkalyq keńes jumysyna jańasha serpin beredi. Biz eshkimge esigimizdi jaýyp otyrǵan joqpyz. Eýrazııalyq ekonomıkalyq keńistik – úlken aýqymdaǵy naryq. Ol elderdiń ekonomıkasyn jandandyrýǵa múmkindik beredi. Bir sózben aıtqanda, biz ıntegrasııany tereńdetýdi odan ári de basshylyqqa alatyn bolamyz, dedi óz sózinde Belarýs Prezıdenti.

Reseı Prezıdenti V.Pýtın óz kezeginde Joǵary Ekonomıkalyq keńes otyrysynda ıntegrasııany damytý, Eýrazııalyq ekonomıkalyq keńistik kókjıegin keńeıtý úshin jańa baǵyt-baǵdarlar belgilengenin, bulardyń barlyǵy taýar, kapıtal, jumys kúshiniń erkin aınalymyn jaqsartýǵa, memleketter aldyndaǵy kez kelgen kedergilerdiń túıinin tarqatýǵa yqpal etetinin atap ótti. Biz Eýrazııalyq ekonomıkalyq odaq qurýdyń joldaryn jan-jaqty qarastyrdyq. Buǵan qosa, energetıkalyq, kólik júıelerin qurý, ulttyq, ekonomıkalyq, quqyqtyq bazalar tetigin jaqsartý máselelerin de kún tártibine qoıdyq, dedi V.Pýtın.

Qazaqstan Prezıdenti N.Nazarbaev Eýrazııalyq ekonomıkalyq odaq qurý týraly kelisim jobasy jan-jaqty talqydan ótip, bul jobany keler jyldyń mamyr aıynda maquldaý qajettigin atap ótti. Biz Keden odaǵyna múshe memleketter arasyndaǵy taýar aınalymyn arttyrýymyz kerek. Bul oraıdaǵy kedergiler túgeldeı joıylýy tıis. Keıde biz qabyldaǵan sheshimder tolyqtaı oryndalmaı jatady. Sondyqtan, bul baǵyttardaǵy jumystardy júıelendirý qajet. Iаǵnı, belgili bir deńgeıde tepe-teńdik saqtalýy shart. Bizdiń qarjylyq júıemiz, saqtandyrý júıemiz ártúrli. Osy sebepti, biz osylardyń ishinen ózimizge eń tıimdisin tańdap, bekitýimiz kerek. Arnaıy jumys tobyn quryp, óz jumystarymyzdy odan ári jalǵastyratyn bolamyz, dedi N.Nazarbaev.

Árıne, Qazaqstan Prezıdenti atap aıtqandaı, ıntegrasııalyq jol – kúrmeýi san salaly, uńǵyl-shuńǵyly kóp jol. Bul jol túrli bógetterden «aqyl» tetigin iske qosyp ótýdi talap etedi. Sol sebepti de, memleket basshylary eýrazııalyq ıntegrasııanyń damýyn Eýrazııalyq odaq qurý negizinde júıeli etýdi kún tártibine shyǵaryp otyr. Qazaqstan Prezıdenti N.Nazarbaev óziniń 2012 jylǵy Joldaýynda da XXI ǵasyrdyń jahandyq qaýip-qaterlerine eýrazııalyq ıntegrasııany tereńdetýmen qarsy turýǵa bolatynyn aıtqan edi. Iаǵnı, Eýrazııalyq ekonomıkalyq odaqtyń qurylýy jalpyaımaqtyq turaqtylyqtyń, ekonomıkanyń básekege qabilettiligin arttyrýdyń negizgi faktory bolmaq.

Joǵary Eýrazııalyq ekono­mıkalyq keńestiń memleket basshylary deńgeıindegi kelesi otyrysy bıylǵy jyldyń jeltoq­san aıynda Reseı astanasy – Máskeý­de ótedi.

Láıla EDILQYZY,

«Egemen Qazaqstan» –

Mınskiden.