Atyshýly «Baraholka» bazarynyń bolashaqta jańasha keıipke enetini belgili boldy. Biraq, ol súrilip tastalmaıdy. Tek, retsiz ornalasqan bazardyń ishki qurylysy buzylyp, satýshyǵa da, halyqqa da qolaıly etip jasalynbaq. Bul týraly «Almaty aqshamy» gazeti jazdy.
Búgingi kezde ishinara ózgeris engiziletin bazardyń jobasy daıyn. Alaıda, «Sálem» saýda núktesinen basqasynyń qurylys jobasy áli bekitilmegen. Jalpy, atqarylatyn jumystar jóninde Jetisý aýdany ákimi Talǵat Razaqovtyń tóraǵalyǵymen ótken bazar basshylarymen basqosýda málim boldy.
«Baraholka» bolashaqta jańa keıipke enetin bolǵanymen, bul rette áńgimemiz Jetisý aýdanyna qarasty bóligi, ıaǵnı batys jaǵynyń ǵana nobaıy jóninde bolyp otyr. Al ondaǵy bazarlar ǵımarattarynyń nobaıy bekitilgen bette, qurylys jumystary da bastalatyn bolady. Jalpy, ondaǵy saýda oryndary ornalasý jaǵdaıyna qaraı «qyzyl syzyqty» basyp ketken jáne bul qatelik bazardyń basynan bastap, aıaǵyna deıin jalǵasady. Endi osy jónsizdikti jónge keltirý úshin jańa nobaıǵa saı, bazarlar joldyń eki jaǵynda da 60 metrge sheginý kerek. Osylaısha, kólik jolynyń keńdigi 120 metrge ulǵaıady. Bul tóńirektegi saýda oryndarynyń ishinde tek «Adem» saýda úıi ǵana tártipke saı ornalasqan eken. Endi odan arǵylarynyń bári osy «Adem» turǵan deńgeıde bir syzyqqa rettelýi tıis.
Jańa nobaıǵa saı bazar ortasynda alty jolaqty kólik joly paıda bolady. Jol shetinen eki jaǵynan taǵy 2 jolaqty asfalt salyný kózdelýde. Bular kólikterdiń bazarlarǵa kirip-shyǵýyna qolaıly jaǵdaı týǵyzady. Al alty jolaq sáıkesinshe úsh-úshten qarsy baǵyttaǵy kólik qozǵalysyna qyzmet etedi. Odan keıin bazardyń syrtynda, ishki qýystarynda da kólik turaqtary meılinshe jetkilikti deńgeıde oryn alady.Munan ózge, jolústi ótkel kópirlerin salý da josparlanyp otyr. Búginge deıin tek bireýiniń ǵana qurylysy aıaqtalǵan. Bazardyń sońyna deıin taǵy sondaı tórteýi paıda bolmaq. Sondaı-aq, bazarǵa júk tasıtyn kelimdi-ketimdi kólikter úshin artqy jaǵynan taǵy 4 jolaqty (ıaǵnı, qarsy baǵytty eki jolaqty) jol salynatyn boldy. Sonymen birge, «Sálem» bazaryna jaqyn tustan uzyn saýda oryndarynyń arasynan ótetin taǵy bir jol túspek.
Baqytbek Keneshuly.