Grýzııanyń bıligi jaqyn kúnderde endi Eńbek týraly kodekske ákelerdiń de bala kútimimen otyratyn dekrettik demalys alýy zańdastyrylatyn túzetý engizý máselesin qarastyryp jatyr. Bul týraly «Lenta.Rý» habarlady.
«Bizge Grýzııa úshin múldem jańalyq bolyp tabylatyn osyndaı másele usynyldy. Bul otbasy tabysyna kemirek zalal kelýi úshin, bala týǵannan keıin ata-analardyń qaısysy bala kútimimen qalatyny jaıyn zańdastyryp beretin bap bolady», - dedi osyǵan oraı ádilet mınıstri Tea Sýlýkanı.
Osymen birge, mınıstr ázirge áńgimeniń usynys qalpynda turǵanyn da eskertip ótti. Ol parlamentke usynylǵanǵa deıin áli birqatar jergilikti jáne halyqaralyq uıymdar, sondaı-aq bıznes qurylymdary ókilderiniń talqylaýlarynan ótip, keńesteri tyńdalady.
Al osy tusta Grýzııa parlamentine dekrettik demalystyń ýaqyty men aqysyna qatysty ózgerister men tolyqtyrýlar engizý jóninde budan da basqa zań jobasy kelip tústi. Jobaǵa sáıkes, onyń merzimi qazirgi 477-niń ornyna 730 kúntizbelik kún bolýǵa tıis. Sondaı-aq aqy tólenetin demalys kúnderi sany 126-dan 183 kúnge deıin óspekshi. Munyń sońy dekrettegi kisilerdiń alatyn aqylarynyń 1 myń larıge (600 dollar shamalas) deıin kóbeıetinin bildiredi. Joba aldaǵy 2014 jyldyń 1 qańtarynan zań bolyp júzege asady dep kútilýde.
Murat Aıtqoja.