Petropavldyń ońtústik qaqpasynyń kireberisinde tamasha "Jas órken" shaǵyn aýdany boı kótergen, dep habarlaıdy Egemen.kz
Bul aýdannyń úıleri kileń jańa jobamen salynǵan, zamanaýı ásem úıler. Alaıda osy úıler turǵyndarynyń mádenıeti ózderiniń tamasha úılerine sáıkes bolmaı, ózimshildikke boı urǵyzǵan.
Páterlerin retke keltirýge asyqqan turǵyndar qurylys qoqystaryn úıindige aınaldyryp, sol mańdaǵy jer úılerdiń mańyna úıip tastaǵan. Narazylyqtaryn bildirgen jer úılerdiń turǵyndary áleýmettik jelilerde qoqys tógilgen jerlerdiń sýretteri men vıdeolaryn jarııalaýda. Jergilikti polısııa qyzmetiniń qyzmetkerleri tazalyqty saqtaý erejelerin buzǵandardy anyqtaý jáne aldyn alý boıynsha jumys júrgizip jatyr. Ýchaskelik polısııa ınspektory úsh turǵyndy jaýapqa tartty: bireýi eskertý alyp, ekeýine aıyppul salyndy. Ýchaskelik ınspektordyń jumysynyń nátıjesinde qazir qoqys shyǵaryldy.
Petropavl qalasy PB jergilikti polısııa qyzmeti bólimi bastyǵynyń orynbasary, polısııa podpolkovnıgi Aıdyn Ahmaǵambetovtyń aıtýyna qaraǵanda negizinen qala shetindegi turǵyndar arasynda bolyp turatyn bul problemanyń qala ortalyǵyna aınalady degen jańa "Jas órken" shaǵyn aýdanynda oryn alǵany tipti ókinishti. Jalpy, jyl basynan beri Petropavl qalasy PB polıseıleri Ákimshilik quqyq buzýshylyq týraly kodekstiń "Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý" baby boıynsha 2659 hattama toltyrǵan. Quqyq buzýshylardyń kópshiligine eskertý jasalyp, 82 adamǵa aıyppul salynypty.