Bizdiń bul shaǵyn maqalamyzǵa arqaý bolyp otyrǵan azamat – 10 jylǵa bas bostandyǵynan aıyrylyp, búginde Qyzylorda qalasyndaǵy ZK169/5 mekemesinde jazasyn ótep jatqan Baqytjan Esenbaev degen otandasymyz. Onyń qolynan shyqqan kózdiń jaýyn alatyn túrli kemeler maketi talaıdy tamsandyrmaı qoımaıdy. Búginde sheberdiń «qorjynynda» keme, ushaq jáne basqa da buıymdar bar.
Qyzylorda oblysy boıynsha qylmystyq-atqarý júıesi departamenti (QAJD) tarapynan joldanǵan málimette Baqytjan ZK169/5 mekemesine 2017 jyly jazasyn óteýge kelgen. Erekshe óner ıesiniń bul kásipke qalaı kelgeni jóninde Qyzylorda oblysy boıynsha QAJD usynǵan aqparatta Baqytjan bylaı depti: «Men bul mekemege túsken jyly aldymen kirpish zaýytynda jumys istedim. Jumysy aýyr boldy. Keıin turaqty bir ispen aınalysyp, onyń ústine tıisti jalaqymdy alyp otyraıyn dedim. Bala kúnnen kemeniń kapıtany bolýdy armandaýshy edim. Sol armanymdy shaǵyn keme maketin jasaý arqyly júzege asyrǵandaımyn. Bir kúni aǵash sehynda jumys istep jatqan jigitterdiń isine qarap, qatty qyzyqtym. Negizi, qolónermen aınalysý adamǵa erekshe áser syılaıdy. Ár qoldan shyqqan dúnıeni bar yntańmen berilip jasap, nátıjesinde jurt qyzyǵarlyqtaı keremet buıym shyqsa, eńbegińniń jemisin kórgendeı bolasyń».
Baqytjan kemeni jasaý úshin aldymen qaǵazǵa onyń maketin syzyp alady eken. Odan keıin onyń qańqasyn ázirleý úshin tıisti aǵash daıyndaıdy. «Keme jasaýǵa kókterek aǵashyn tańdap alǵan durys. О́ıtkeni ol ıilgish, keme jasaý úshin taptyrmaıtyn aǵash. Bul jumys asa sabyrlyq pen tózimdilikti qajet etedi. Bir keme jasaý úshin shamamen on kún men bir aıdyń arasynda ýaqyt ketedi. Iаǵnı shaǵyn kemeni 7-10 kúnde, al úlken kemeni jasaý úshin bir aı ýaqyt ketýi múmkin. Onda da qolyńda qajetti materıaldar bolsa», depti sheber.
«Baqytjan Esenbaevtyń jumysyna qarap otyryp, onyń óz kásibin asa súıispenshilikpen atqaratynyn baıqadyq. Qolyna alǵan ár aǵashqa muqııat qarap shyqqan sheber kemege tańdap alǵan aǵashtaryn arnaıy quraldarymen tazartýdy bastap ketti. Aǵashty tegistep shyqan soń, kerek ólshem boıynsha kesip, bir-birine japsyryp shyqty. Tipti kemeniń jelkenin tańdaýǵa da asa bir erekshelikpen mán beredi eken. Jelkendi kóbine kemeniń túsine qarap tańdap alatyn kórinedi. Birneshe bólshegi men óte kóp quramnan turatyn kemeni jasap jatqan Baqytjannyń qoly qolyna juqpaıdy. Birese syzyp, ólshem birlikterin salystyrsa, endi birde ony kesip, bir-birine túıistirip kórip jatady. Bir qyzyǵy, keme jasaý úshin eshqandaı shege men burandanyń qajeti joq eken. Iá, sheberdiń týyndysy tamsandyrmaı qoımaıdy», delingen Qyzylorda oblysy boıynsha QAJD usynǵan aqparatta.
Aldaǵy ýaqytta túrli kúrdeli keme qurastyrýǵa bel býǵan Baqytjannyń qolynan búginde 40-qa jýyq sý kóliginiń maketi daıyndalypty. Sheberlik pen tabandylyqty talap etetin bul kásipti násip etken jazasyn óteýshiniń jeke ómirine de toqtala keteıik.
B.Esenbaev Qyzylorda oblysy, Syrdarııa aýdany, Tereńózek kentinde dúnıege kelgen. Ata-anasynyń bireýdiń ala jibin attama dep ósirgen tálim-tárbıesine qulaq aspaǵanyna qazir qatty ókinedi eken. Bostandyqta júrgende jeke sharýa qojalyǵyn basqaryp, kásibin dóńgeletip júrgen kásipker sol bir jańsaq iske ne úshin barǵanyn kúni búginge deıin ózi de tolyq túsinbeıtin kórinedi.
Jubaıy qaıtys bolǵannan keıin jalǵyz qyzymen jáne qart anasymen qalǵan Baqytjan jan kúızelisin bastan ótkergen tárizdi. Áıtpese, aqylshy anasy bar, qyr gúlindeı qulpyrǵan qyzy men shaǵyn kásibi bar azamatqa esirtki satyp ne boldy? On jylǵa kesilgen jigittiń endigi armany – bostandyqqa aman-esen shyǵyp, qart anasy men qyzyna qamqor bolyp, el qatarly ómir súrý.