Eýropadaǵy eń bedeldi promoýshen – ASA (Absolute Championship Akhmat) 5 qyrkúıekte Máskeýde aralas jekpe-jekten asa iri halyqaralyq týrnır uıymdastyrýdy kózdep otyr. Sol jarysta qazaqtyń qaısar uly, «Alash Praıd» klýbynyń múshesi Nursultan Qasymhanov óner kórsetedi. Ol reseılik Álıhan Súleımanovpen kúsh synasady. Aıtýly qos sportshy jartylaı jeńil, ıaǵnı 65,9 kılo salmaq dárejesinde saıysqa túsedi.
Almaty oblysy Alakól aýdanynyń týmasy Nursultan Qasymhanov kezinde qazaq kúresimen shuǵyldanǵan. Ulttyq sport túrinen ótken jarystarda biraz tabysqa jetkennen soń aralas jekpe-jekke aýysady. Elimizde jaýyngerlik ónerdi damytýǵa eleýli úles qosyp júrgen Danııar Qasqaraýov jetekshilik etetin «Alash Praıd» klýbynda sheberligin shyndaǵan ol óziniń tusaýkeser kezdesýin 2014 jyldyń sáýir aıynda Rýslan Seripqulovqa qarsy ótkizip, basym túsedi. Sol kezden beri barlyǵy 12 ret aıqas alańyna shyqqan Qasymhanov 10 básekeni óz paıdasyna sheshti. Atap aıtsaq, qandasymyz aýǵanstandyq Ámir Ibohým, óz jerlesteri Salat Bıshhanov, Qanat Dosmaǵambetov, Qanat Raqymov, Raıymbek Orynbaı, qyrǵyzstandyq Jámshitbek Áziret, reseılik Dmıtrıı Ermolaev pen Aleksandr Pedýson jáne belarýstyq Ivan Jvırblııany jeńedi. Sol jekpe-jekterdiń teń jartysyn merziminen buryn aıaqtady.
Taǵy eki kezdesýde Nursultan jeńilistiń kermek dámin tatty. Ol 2014 jyly qazaqstandyq Vıktor Kıchıgınge jáne 2018 jyly rýmynııalyq Bogdan Barbýge ese jiberdi. Ekeýinde de báseke taǵdyryn tóreshiler sheship, jeńisti qarsylastaryna berdi.
Máskeýde Nursultan Qasymhanov Álıhan Súleımanovpen jekpe-jekke shyǵady. Cheshenstannyń týmasy óte tájirıbeli sportshy. Ol da osy sport túrin 2014 jyldan beri serik etýde. Sol aralyqta 13 márte oktagonǵa shyǵyp, 11 ret jeńis toıyn toılady. Jeti qarsylasyn esinen tandyrdy. Bıyl naýryz aıynda Almatyda ótken týrnırde Álıhan bizdiń Ermek Tlaýovti tize búktirgen bolatyn. Bul joly biz Nursultan óz komandalas áriptesiniń jibergen esesin qaıtarady dep úmittenemiz.
– Bul óte tartysty jekpe-jek bolatyny sózsiz. Álıhan – talaı dúrmekte óziniń myqtylyǵyn san márte moıyndatqan sańlaq. Biraq bizdiń Nursultan da osal emes. Ol – eshkimnen qaımyqpaıtyn, aldynda qandaı dúleı kúsh ıesi tursa da esh aıanbaı aıqasatyn erjúrek jigit. Sondyqtan osy aıqasty tamashalaǵan kórermenderdiń aıyzy ábden qanatynyna esh kúmánim joq, – deıdi «Alash Praıd» klýbynyń prezıdenti Danııar Qasqaraýov.
5 qyrkúıek kúni Reseı astanasynda jalaýy jelbireıtin jarystyń basty jekpe-jegi jartylaı orta salmaq dárejesindegi (77,2 kılo) Kabardıno-Balkarııanyń ókili Álı Bagov pen daǵystandyq Murat Abdýllaev arasynda ótedi. Taǵy bir negizgi tartysta Edýard Vartanıan (70,4 kılo) men Muhamed Kokov kúsh synasady.