"Nur Otan" partııasynyń hatshysy Arman Qyryqbaevtyń jáne erekshe qajettilikteri bar adamdardy qoldaý máselelerimen aınalysatyn jurtshylyq ókilderiniń qatysýymen "Nur Otan" partııasynyń praımerızine arnalǵan kezekti ZOOM-konferensııasy ótti, dep habarlaıdy Egemen.kz QazAqparatqa silteme jasap.
Qatysýshylar arasynda praımerızge úmitkerler – múmkindigi shekteýli azamattar bar. Olar úlken erik-jigerdiń, ómirlik belsendiliktiń, jumys isteý jáne qoǵamǵa paıdaly bolýdyń úlgisin pash etip keledi. Konferensııany "Almaty qalasy múgedekter uıymdarynyń qaýymdastyǵy" zańdy tulǵalar birletiginiń tóraıymy Lázzat Qaltaeva júrgizdi.
"Jergilikti jerler bolsyn, ortalyq bolsyn, kúndelikti ómirde, ártúrli problemalarǵa tap bolǵan jáne olardy jeńip shyqqan, ómirlik ustanymy bar azamattar depýtattar arasynda neǵurlym kóp bolsa, sheshim qabyldaý resepterin biletin bolady. Bul bizdiń elimiz úshin paıdaly bolatynyna senimdimin", - dedi Arman Qyryqbaev.
Onyń aıtýynsha, praımerız – úlken múmkindik, sondyqtan bul suraqqa baıyppen qaraý kerek. "Nur Otan" partııasy erekshe qajettilikteri bar adamdardyń ómir súrý sapasyn arttyrý máselelerine árqashan kóńil bóledi.
О́ıtkeni, partııanyń eń joǵary qundylyqtary – adam jáne onyń quqyqtary men bostandyqtary, bul Saıası doktrınada kórsetilgen. 2014 jylǵy 17 qańtarda QR Tuńǵysh Prezıdenti, partııa Tóraǵasy N.Á. Nazarbaev "Qazaqstan joly – 2050" atty Qazaqstan halqyna jyl saıynǵy Joldaýynda "Nur Otan" partııasyna múmkindigi shekteýli adamdardyń ómir súrý sapasyn arttyrý boıynsha jumysqa jetekshilik etýdi tapsyrdy.
Sol jyly "Kedergisiz keleshek" jobasy iske qosyldy. "Teń múmkindikter álemi" múgedek balalardyń ata-analar qoǵamy" QB basshysy Nurgúl Uljekova onlaın-konferensııa barysynda erekshe adamdardyń ómirin ózgertý múmkindigin praımerızden kóretinin atap aıtty.
"Meniń partııaǵa degen senimim «Kedergisiz keleshek» partııalyq jobasynyń jemisti júzege asyrylýy barysynda arta tústi. О́z balama ǵana emes, erekshe qalaýlary bar myńdaǵan balalarǵa kómektesýge degen analyq ynta-jigerim sońǵy 4 jylda ınklıýzıvti sporttyq seksııalardy tegin ótkizýime sebep boldy. Búgingi tańda bizdiń seksııada múgedektiktiń túrli formasyndaǵy 150 bala bar, taǵy 200-ge jýyǵy kezekte tur. Sebebi olardy qarapaıym sporttyq seksııalar qabyldamaıdy. Bul júıeli problemaǵa aınalǵan. Praımerız arqyly men osy problemaǵa nazar aýdartyp, vedomstvoaralyq ózara is-qımyldyń daıyn algorıtmin jáne múgedektigi bar adamdar arasynda buqaralyq sportty damytýǵa, sondaı-aq ınklıýzıvti bilim berý men áleýmettik qorǵaýǵa qatysty normatıvtik-quqyqtyq aktilerge birqatar tolyqtyrýlardy usynǵym keldi", dedi ol.
Esterińizge sala keteıik, buǵan deıin Elbasy, Partııa Kóshbasshysy Nursultan Nazarbaev óziniń vıedoúndeýinde Nur Otan-nyń jaqtastaryn jáne partııalastardy elimiz úshin mańyzdy saıası oqıǵaǵa belsene qatysýǵa shaqyrdy. 17 tamyzda elimizdiń barlyq aımaqtarynda "Nur Otan" partııasynyń praımerızderine kandıdattardy usyný jáne tirkeý bastaldy.
Qazirgi ýaqytta alty myńnan astam adam partııaishilik irikteýge qatysýǵa nıet bildirdi. Úgit-nasıhatqa daıyndalý úshin kandıdattarǵa 31 tamyzdan 6 qyrkúıekke deıin 7 kún bólinedi. 7 qyrkúıek pen 3 qazan aralyǵynda kandıdattardyń úgit-nasıhat jumystary, sonyń ishinde 14-30 qyrkúıek aralyǵynda kópshilikke jarııa debattar ótedi. Debattar "Praımerız" arnaıy aqparattyq júıesi arqyly partııanyń resmı akkaýnttarynda kórsetiledi.