Elimizde aqbókenderdiń sany kóbeıip keledi. Jaǵymdy nátıjege memlekettik qaýipsizdik sharalaryn kúsheıtý men tabıǵat ınspektorlarynyń materıaldyq-tehnıkalyq jaraqtalýyn jaqsartý septigin tıgizdi. Bul týraly Ekologııa, geologııa jáne tabıǵı resýrstardy qorǵaý mınıstrliginiń bastamasymen Aqmola oblysyndaǵy "Qorǵaljyn" qoryǵyna uıymdastyrylǵan baspasóz týry barysynda málim boldy, dep habarlaıdy Egemen.kz
Tabıǵat saqshylary jýrnalısterge kúndelikti jumysy jáne jabaıy janýarlardy brakonerlerden qorǵaýdaǵy qaýip-qater baılanysty málimetterdi aıtty.
Aqmola oblysyndaǵy "Ohotzooprom" ınspektorlar tobynyń basshysy Dostaı Nurbekovtiń aıtýynsha, búginde óńirde shamamen 70 myńǵa jýyq aqbóken bar.
Janýarlardy qorǵaýdy kúsheıtý jáne memlekettik baqylaýdy arttyrý arqyly olardyń sany kóbeıgeni baıqalady. Aımaqta kıikterdiń ósip-ónýine qolaıly tabıǵı jaǵdaılar, onyń ishinde qajetti azyq pen qolaıly klımat yqpal etedi.
"Buryn tehnıkamyz eskirgen kólikter bolǵan, mundaı kóliktermen qyzmetti oryndaý qıynǵa soǵatyn. Brakonerlerdiń tehnıkasy bizdikinen áldeqaıda jaqsy”, deıdi Dostaı Nurbekov.
Tıisti zańǵa sáıkes, erekshe jaǵdaılarda, ómirge qaýip tóngende ınspektorlar qarý qoldanýǵa quqyly.
"Ár ınspektorda oq ótkizbeıtin kókirekshe, karabın nemese tapansha bar", degen D.Nurbekov endi birkelki kıim kııý máselesin jaqsartý qajet ekenin aıtty
Jyl basynan beri Qazaqstanda ustalǵan brakonerlerden 256 tutas et pen 1245 kıiktiń múıizi, sondaı-aq 5 qaraquıryq pen 2 ıtelgi tárkilendi. Aıtylǵandardyń bári Qazaqstannyń Qyzyl kitabyna engizilgen.