Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov Almaty qalasynda jumys saparymen júr. Ol ádidet departamentiniń, qalalyq sottyń jáne advokattar alqasynyń qyzmetkerlerimen birneshe kezdesýler ótkizdi, dep habarlaıdy Egemen.kz.
Senator parlamentshilerdiń bastamasy boıynsha ázirlengen "Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly" zań jobasyn egjeı-tegjeıli talqylady. Aıta ketý kerek, zańgerler tarapynan zań jobasy úlken qyzyǵýshylyq týdyrdy jáne búginde keńinen talqylanýda.
Vladımır Volkov azamattardyń bilikti zań kómegin alýǵa konstıtýsııalyq quqyǵy bar desek, onyń mańyzdy tarmaqtarynyń biri qylmystyq sot isin júrgizýge advokattardyń qorǵaýshy retinde taǵaıyndalý jáne azamattyq sot isin júrgizýge ókil retinde qatysýy ekenin atap ótti.
Usynylyp otyrǵan zań jobasy azamattardyń bilikti zań kómegin alý quqyǵyn iske asyrýyna kepildikti arttyrady.
Zań konsýltasııalaryn joıý, advokattyq lısenzııadan ómir boıy aıyrý, zań konsýltanttaryn ákimshilik sot óndirisine jiberý jáne olardyń kásibı jaýapkershiligin mindetti saqtandyrý jáne basqa da máseleler talqylandy. Bul máselelerdiń barlyǵy jan-jaqty jáne egjeı-tegjeıli zertteýdi qajet etedi. Kelip túsken usynystar Senat komıteti jumys tobynyń qaraýyna beriledi, dep sendirdi Vladımır Volkov.
Sýdıalarmen kezdesýde Vladımır Volkov sheshim qabyldaýda sýdıalardyń táýelsizdigi men derbestigin, sot tóreligin júzege asyrý sapasyn arttyrýǵa, sýdıalyqqa kandıdattardy irikteý tásilderin ońtaılandyrýǵa baǵyttalǵan júıeni odan ári jetildirý máselelerin talqylady. Ákimshilik rásimdik-prosestik kodeksiniń negizgi erejeleri de qaraldy.
Qalalyq sot tóraǵasy jańa ákimshilik sottar qoldanystaǵy qyzmetkerler quramynan jáne qoldanystaǵy materıaldyq-tehnıkalyq bazanyń negizinde jasaqtalatynyn habarlady. Ákimshilik ádilet sheńberinde isterdi qaraıtyn sýdıalar biliktilikterin jetildiretin bolady.
"Qazaqstan Respýblıkasynyń Ákimshilik rásimdik-prosestik kodeksin qabyldaý – memleket úshin mańyzdy oqıǵa. Ákimshilik rásimder men sot isin júrgizýdiń jańa qaǵıdattaryn engizý azamattardy bılik sýbektileri tarapynan bolýy múmkin teris qylyqtardan qorǵaýǵa, sondaı-aq memleket pen qoǵam arasynda týyndaıtyn qatynastarǵa tyń serpin beredi", dedi senator.
Senator advokattyq qoǵamdastyqpen «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasyn talqylady. Kezdesý qorytyndysy boıynsha qalalyq advokattar alqasynyń tóralqasy keıbir zańnamalyq normalar boıynsha óziniń saraptamalyq pikirin bildirdi, ony depýtat Senattyń beıindi komıteti zerdeleıtinin atap ótti.