Elimizde alǵash ret stýdentter, magıstranttar, doktoranttar men túlekterdiń tikeleı baǵalaýymen joǵary oqý oryndarynyń reıtıngi jasaldy. Bilim alýshylar men túlekterdiń pikirin saralap, bilim ordalarynyń úzdigin anyqtaý – Qazaqstan stýdentteri alıansynyń bastamasy.
«Áleýmettik saýaldama týraly aqparatty BAQ, Instagram, Facebook sııaqty áleýmettik jelilerde, sonymen qatar Qazaqstan stýdentter alıansynyń óńirlik fılıaldary, belsendileri kúshimen stýdentter arasynda tarattyq. Stýdentter, magıstranttar, doktoranttar men túlekter áleýmettik saýaldamaǵa eki tilde onlaın-formatta qatysa aldy», deıdi alıans prezıdenti Ilııas Tústikbaev.
14 mamyrda bastalǵan saýaldamaǵa 20 maýsymda núkte qoıylǵan. Oǵan elimizdiń 14 oblysy men 3 respýblıkalyq mańyzy bar qalasynda ornalasqan 110 joǵary oqý ornynyń bilim alýshylary men túlekteri atsalysqan.
«Ulttyq ekonomıka mınıstrligi Statıstıka komıtetiniń 2020 jyldyń aqpan aıyndaǵy málimetterine sáıkes 2019-2020 oqý jylynda elimizde 604 345 stýdent tirkelgen. Onyń 112 247-si bizdiń áleýmettik saýaldamaǵa qatysty. Bul respýblıkadaǵy jalpy stýdentter sanynyń 18,6%-yn quraıdy. Bizdiń saýaldamaǵa qatysqan 112 247 adamnyń 84.25%-y bakalavr, 4,7%-y magıstrant, 0,8%-y doktorant jáne 10,25%-y túlekter», deıdi uıym basshysy.
Joǵary oqý oryndarynyń arasyndaǵy úzdikter 9 talap boıynsha anyqtaldy. Atap aıtar bolsaq, saýaldama ýnıversıtettiń bilim berý baǵdarlamasy, materıaldyq-tehnıkalyq bazasy, ondaǵy sybaılas jemqorlyq, túlekterdi jumyspen qamtý, jataqhanalardyń jaǵdaıy, ashanalardaǵy tamaq sapasy men baǵasy, ýnıversıtet basshylyǵynyń ashyqtyǵy, stýdentterdiń ózin ózi basqarý deńgeıi jáne mamandyq tańdaý sebebi sııaqty suraqtardy qamtydy. Ilııas Tústikbaevtyń aıtýynsha, reıtıng joǵarǵy bilimdi táýelsiz baǵalaý, abıtýrıentterge kásiptik baǵyt-baǵdar berip, jan-jaqty aqparatpen qamtamasyz etý, elimizdegi bilim júıesin damytýǵa úles qosý jáne elimizdegi bilim oryndaryna jaýapty mınıstrlikter men JOO basshylyqtaryna usynystar ázirleýdi maqsat etedi.
Sonymen nátıjelerge toqtalsaq, táýelsiz reıtıng boıynsha Nazarbayev University, S.J.Asfendııarov atyndaǵy Qazaq ulttyq medısına ýnıversıteti, L.N.Gýmılev atyndaǵy Eýrazııa ulttyq ýnıversıteti alǵashqy úzdik úsh ýnıversıtet qatarynda. Odan keıin stýdentter men túlekter S.Seıfýllın atyndaǵy Qazaq agrotehnıkalyq ýnıversıtetin, Ál-Farabı atyndaǵy Qazaq ulttyq ýnıversıtetin, Qazaqstan Respýblıkasy Prezıdentiniń janyndaǵy Memlekettik basqarý akademııasyn, Súleımen Demırel atyndaǵy ýnıversıtetti, Astana IT ýnıversıtetin, M.S.Nárikbaev atyndaǵy Qazaq gýmanıtarlyq zań ýnıversıteti men Qazaq ulttyq horeografııa akademııasyn úzdik dep tanydy.
Al Azamattyq avıasııa akademııasy, Qaztutynýodaǵy Qaraǵandy ekonomıkalyq ýnıversıteti, O.A.Baıqońyrov atyndaǵy Jezqazǵan ýnıversıteti, Narhoz ýnıversıteti, Qazaqstan ınnovasııalyq akademııasy, Halyqaralyq bıznes ýnıversıteti, Á.Qýatbekov atyndaǵy Halyqtar dostyǵy ýnıversıteti, Astana ýnıversıteti, Qazaq qatynas joldary ýnıversıteti, Almaty ekonomıka jáne statıstıka akademııasy stýdentter men túlekterdiń kóńilinen shyqpaıtyny málim boldy. Atalǵan oqý ordalary reıtıngtiń sońǵy oryndaryna jaıǵasty.
Qazaqstan stýdentteri alıansynyń saýaldamasyna M.Qozybaev atyndaǵy Soltústik Qazaqstan memlekettik ýnıversıtetiniń stýdentteri men túlekteri belsendi qatysqan. Reıtıng jasaýǵa qatysqandar stýdentterdiń ózin ózi basqarý uıymdary belsendi jumys jasaıtyn ýnıversıtet retinde Nazarbayev University-tin tańdaǵan. Al kerisinshe Shet tilder jáne iskerlik karera ýnıversıtetindegi stýdenttik uıymdarǵa bilim alýshylardyń kóńili tolmaıdy eken. Nur-Múbárak Egıpet ıslam mádenıeti ýnıversıteti jemqorlyq faktileri kezdespeıtin ýnıversıtet dep tanyldy. Degenmen, saýaldamaǵa qatysqandar Narhoz ýnıversıtetinde sybaılas jemqorlyqtyń órship turǵanyn aıtty. Bilim alýshylardyń usynystary men shaǵymdaryna qulaq túrmeıtin, stýdentke baǵdarlanǵan bilim berý qaǵıdasyn ustanbaıtyn bilim basshylyǵy – Q.I.Sátbaev atyndaǵy Qazaq ulttyq tehnıkalyq zertteý ýnıversıtetiniń rektoraty. Eń arzan jáne dámdi taǵamdary bar ashana – S.Seıfýllın atyndaǵy Qazaq agrotehnıkalyq ýnıversıtetiniń ashanasy. Baǵalary qoljetimsiz ashana – Sh.Ýálıhanov atyndaǵy Kókshetaý memlekettik ýnıversıtetiniń ashanasy. Túlekterin jumysqa ornalastyrý boıynsha Abaı Myrzahmetov atyndaǵy Kókshetaý ýnıversıteti, S.Amanjolov atyndaǵy Shyǵys Qazaqstan memlekettik ýnıversıtetteri kósh bastap tur. Al О́.Baıqońyrov atyndaǵy Jezqazǵan ýnıversıtetinde jumysqa ornalastyrý kórsetkishi tómen. Qazaq qatynas joldary ýnıversıteti eńbek naryǵyn eskermeıtin bilim baǵdarlamasymen oqytady degen eskertý tústi. Al zamanaýı materıaldyq-tehnıkalyq bazasymen ozyp shyqqandar: Nazarbayev University, Súleımen Demırel atyndaǵy ýnıversıtet. Stýdentter úshin bilim baǵdarlamasymen qatar mańyzdy másele – jataqhana. Osy oraıda Nazarbayev University, Qazaq ulttyq horeografııa akademııasynyń jataqhanalary joǵary baǵaǵa ıe boldy. Al Á.Qýatbekov atyndaǵy Qazaqstan ınjenerli-pedagogıkalyq Halyqtar dostyǵy ýnıversıteti men Azamattyq avıasııa akademııasynyń jataqhanalary bilim alýshylar men túlekterdiń kóńilinen shyqpaıtyn kórinedi.
Qazaqstan stýdentteri alıansy uıymdastyrǵan saýaldama ashyq ári erikti túrde ótti. Buǵan deıin gazetimizde habarlaǵanymyzdaı, oǵan otandyq bilim ordasynda oqyp ne kezinde bilim alǵan ár azamat qatysa aldy. Joǵary bilim beretin oqý oryndarynyń qyzmetin táýelsiz baǵalaý úshin jasalǵan reıtıngtiń nátıjesi elimizdegi oqý oryndaryna jaýapty mınıstrlikter men JOO basshylyqtaryna joldanyp, tıisti sharalar qabyldanady degen senimdemiz.