Qazaqstandyq Fırýza Sháripova (10-1, 5 KO) IBA nusqasy boıynsha birinshi orta salmaqta álem chempıony atandy. Reseıdiń Qazan qalasynda ótken kásibı boks keshinde jerlesimiz tanzanııalyq Heppı Daýdıdi (8-6-1, 4 KO) aıqyn basymdyqpen jeńdi.
Bul keshte qazaqstandyq boksshy báseke tizginin birden qolǵa alyp, soqqylaryn qarsylasyna dál daryta bildi. Aıaǵymen de jyldam qımyldaǵan Fırýzanyń basymdyǵy aıqyn kórindi. Onyń joıqyn soqqysyna shydaı almaǵan H.Doýdı besinshi raýndta jekpe-jekti jalǵastyrýdan bas tartty.
Osylaısha kásibı boksqa qaıta oralǵan 25 jastaǵy F.Sháripova qarsylasyn tehnıkalyq nokaýtpen jeńdi.