SQO-nyń Jambyl aýdanyndaǵy «Novorybınka» men «Kladbınka» selolarynyń arasynda qandy bolmasa da óreskel qylmys boldy, - dep habarlaıdy Egemen.kz.
Aýdan ortalyǵy Presnovka selosynan «VAZ-2107» kóligimen shyqqan 65 jastaǵy turǵynǵa aýyl shetinde eki adam ala ket dep qol kóteredi. «Ala ketsem nesi bar, ázer bolsa benzınge aqsha tabarmyn» dep oılaǵan júrgizýshi toqtap, olardy mingizip alady. Keıin belgili bolǵanyndaı jolaýshylardyń biri 35, ekinshisi 28 jasta eken jáne ekeýi de buryn sottalǵan. Eki jolaýshy buǵan deıin de iship alǵandaryna qaramaı, salonnyń ishinde de araqtan aýyzdary bosamaıdy. Shal adamdy basynyp, mashınasyn tartyp alý da mas bastaryna kele qalady. Sóıtip, oǵan qoqan-loqy kórsetip, mashınasy men telefonyn tartyp alyp, bireýi rólge otyrady. Biraq araqtyń ýyty basyn alǵan ol rólge ıe bola almaı, «Novorybınka» selosynyń tusynda kıývetke túsip, qamys basqan kólshikke qoıyp ketedi. Áıteýir eshkimge zaqym kelmeı, dalaǵa shyǵady.
Ashyq dalaǵa shyqqan soń mashınany ıesine qaldyryp, eki mas «Kladbınka» selosyna bet alyp, ótip bara jatqan kólikke qol kóterip, minip ketedi. Abyroıdan ábden aırylǵan eki mas bul aýylda dúkenge qaraqshylyq shabýyl jasaıdy. Dúkenshini qorqytyp, 44 myń teńge aqshasyn tartyp áketedi.
Aýdandyq polısııa bólimine dabyl osy jerden túsedi. Jedel kele jatqan polısııa qyzmetkerleri kıývetke túsip ketken mashına men onyń ıesin de jolda kóredi.
Jedel izdestirý barysynda qylmyskerler aýyl shetinen tabylady, ábden mas bolyp, sileıip qalǵandardy polısııa ońaı quryqtaǵan. Atalǵan faktiler sotqa deıingi tergep-tekserýdiń biryńǵaı tizilimine Qylmystyq kodekstiń «Avtomobıldi quqyqqa syıymsyz ıelenip alý» jáne «Qaraqshylyq» baptary boıynsha engizildi. Qazir ustalǵandar kúzetpen qamaýda otyr.