Túrkistan qalasyn damytý sheńberinde memleket muqtajy úshin jer telimderin alý kezinde 33,5 mln teńge kólemindegi bıýdjet qarajatynyń jymqyrylǵanyn Túrkistan qalasynyń prokýratýrasy anyqtady.
Memleket muqtajy úshin 6 jer teliminiń ıelikten shyǵarylǵan óteýi retinde atalǵan somany 2019 jyly qala ákimdigi jekelegen tulǵalarǵa tólegen. Alaıda prokýrorlyq taldaýlar barysynda atalǵan jer telimderiniń bir bóligine menshik quqyǵy múldem tirkelmegeni, al ekinshi bóligi jalǵan qujattardyń negizinde rásimdelgeni anyqtaldy.
Iаǵnı «Jer kodeksi» men «Memlekettik múlik týraly» zań talaptaryna sáıkes (alynýǵa jatatyn jyljymaıtyn múlikti) jergilikti atqarý organynyń laýazymdy tulǵalary jer ıeligine quqyq kýálandyrýyn beretin qujattardy muqııat teksermeı, jyljymaıtyn múlikterdi tizimge qosý arqyly atalǵan jerler úshin 33,5 mln teńgege ótemaqyny zańsyz tólegen.
Prokýratýranyń den qoıý aktisi negizinde zańsyzdyqtarǵa jol bergen qala ákiminiń osy salaǵa jaýapty orynbasary T.Musaevqa «Qyzmetke tolyq sáıkes emestigi týraly eskertý» berildi. Sonymen qatar zańsyz quqyqtyq kýálandyrýdy beretin qujattardyń kúshin joıýǵa jáne keltirilgen zalaldy óteýge tıisti sharalar qoldanylýda.
Budan bólek, jınaqtalǵan qujattar negizinde Qylmystyq kodekstiń 366-babyna sáıkes (laýazymdyq ókilettikterdi teris paıdalaný) Túrkistan qalasy ákimdiginiń laýazymdy tulǵalaryna qatysty sotqa deıingi tergep-tekserý júrgizilýde.