Prezıdent janyndaǵy Ortalyq kommýnıkasııalar qyzmetiniń alańynda Konstıtýsııalyq Keńes apparatynyń basshysy Baqyt Nurmuhanov pen Konstıtýsııalyq keńes múshesi Únzıla Shapaqtyń qatysýymen «Qazaqstan Respýblıkasynyń Konstıtýsııasy – qoǵam men memleketti jańǵyrtýǵa negiz» taqyrybynda baspasóz máslıhaty ótti.
Jıyn barysynda Ata Zańnyń mańyzy, Konstıtýsııalyq keńestiń negizgi mindetteri týraly aıta kele, Konstıtýsııanyń 25 jyldyǵyna josparlanǵan sharalar jóninde habarlandy. Únzıla Shapaqtyń aıtýynsha, Konstıtýsııalyq keńestiń negizgi qyzmeti azamattar quqyqtarynyń ústemdigin jáne jalpy memlekettik qundylyqty bekitetin negizgi zańnyń myzǵymastyǵyn qamtamasyz etýge baǵyttalǵan.
– 1996 jyldan bastap búgingi kúnge deıin Konstıtýsııalyq Keńeske 200 ótinish kelip tústi. Barlyq ótinishtiń 29-y Parlament qabyldaǵan jáne Memleket basshysyna qol qoıýǵa usynylǵan zańdardyń Konstıtýsııaǵa sáıkestigin tekserý bolǵan. Al 15 ótinish boıynsha jalpy alǵanda 17 zań Ata Zańǵa sáıkes emes dep tanylǵan. Konstıtýsııalyq Keńes Konstıtýsııanyń normalaryn resmı túsindirý týraly 100-den astam ótinishti qarady. Olar boıynsha, 80-nen astam normatıvtik qaýly qabyldandy», dedi Ú.Shapaq. Onyń sózinen Konstıtýsııanyń ensıklopedııalyq anyqtamalyǵy jaryq kórgeni belgili boldy. Ony daıyndaýǵa qazaqstandyq ǵalymdar atsalysqan.
Konstıtýsııalyq Keńes apparatynyń basshysy Baqyt Nurmuhanov Ata Zańnyń 25 jyldyǵyna oraı josparlanǵan sharalarǵa toqtaldy. Onyń habarlaýynsha, eń aldymen merekeniń biryńǵaı logotıpi paıdalanylady. Ekinshiden, Konstıtýsııanyń ústemdigin qamtamasyz etýge, eldiń táýelsizdigin nyǵaıtýǵa, adam men azamattyń konstıtýsııalyq quqyqtary men bostandyqtaryn qorǵaýǵa qosqan eleýli úlesi úshin birqatar qazaqstandyq mereıtoılyq medalmen jáne tósbelgilerimen marapattalady.
Odan keıin B.Nurmuhanov memlekettik organdar men qoǵamdyq uıymdarǵa marapattaý úshin kvotalar bólingenin málimdedi. Sondaı-aq pandemııamen kúreske tartylǵan kásip ókilderine erekshe nazar aýdarylmaq. Olardyń qatarynda dárigerler, volonterler quqyq qorǵaý organdarynyń qyzmetkerleri jáne basqalary bar.
Ulttyq is-sharalar jospary aıasynda Konstıtýsııalyq Keńes 24-30 tamyz aralyǵynda «Ata zań aptalyǵy» jobasyn júzege asyrady. «Jobanyń maqsaty – qoǵam men memleketti jańǵyrtýdaǵy Konstıtýsııanyń rólin tereń túsiný, halyqtyń qalyń jiginiń nazaryn negizgi zańǵa aýdarý, «Rýhanı jańǵyrý» jalpyulttyq baǵdarlamasy aıasynda qoǵamnyń konstıtýsııalyq mádenıetin arttyrý. Eldegi epıdemııalyq jaǵdaıdy eskere otyryp, olardyń barlyǵy onlaın rejimde ótedi. Osy joba aıasynda búkil el boıynsha onlaın konferensııalar, dóńgelek ústelder, tegin zań keńesteri, vebınarlar, qaıyrymdylyq aksııalary, jańa nysandardy paıdalanýǵa berý, páterlerdiń kiltterin, jeke kýálikterdi tapsyrý jáne basqa da is-sharalar uıymdastyrylady», dedi B.Nurmuhanov.
Is-sharalar kúntizbesin saıttardan jáne birlesken uıymdastyrýshylardan alýǵa bolady. Konstıtýsııalyq Keńestiń negizgi seriktesteri – Aqparat jáne qoǵamdyq damý mınıstrligi, oblystardyń, Nur-Sultan, Almaty jáne Shymkent qalalarynyń ákimdikteri, «Atameken» Ulttyq kásipkerler palatasy jáne basqa da uıymdar.
Jıyn sońynda Ulttyq bank jańa mereıtoılyq monetalardy aınalymǵa shyǵarýdy josparlap otyrǵany aıtyldy. Grafıkalyq kompozısııanyń negizi retinde Konstıtýsııanyń 25 jyldyǵynyń resmı logotıpi qoldanyldy. Nomınaly 200 teńgelik 3 myń moneta jáne 50 myń «100 teńge» daıyndaldy.