Eldegi mańyzdy sharalardyń bárine polısııa qyzmeti qatysyp, qoǵamdyq tártipti saqtaý, jol tártibin baqylaýmen qatar túrli qylmystardy áshkereleýde de belsendilik tanytady. Bıylǵy oraq naýqanynda da polısııa qyrayǵylyq tanytýdy kózdep, "Astyq-2020" jedel-profılaktıkalyq is-sharasyn iske asyrýǵa kiristi, - dep habarlaıdy Egemen.kz.
SQO Polısııa departamentiniń bastyǵy, polısııa polkovnıgi Marat Tólebaev is-shara qarsańynda soltústikqazaqstandyq polısııanyń barlyq jeke quramyn egin orýǵa qatysatyn dıqanshylar men aýyl turǵyndaryna kómek kórsetýge baǵdarlady. Oblysta 4 mıllıon gektarǵa jýyq egistik alqaby bar. Polıseılerdiń mindeti – qoǵamdyq tártipti jáne jol qaýipsizdigin qamtamasyz etý, astyq pen astyq ónimderiniń, janar-jaǵarmaı, aýyl sharýashylyq tehnıkasy men qosalqy bólshekterdiń urlyǵyn anyqtaý jáne jolyn kesý.
Is-shara bastalǵaly oblys boıynsha 5 qylmys tirkelip, olardyń bári de jedel túrde ashyldy. Sonyń biri Ýálıhanov aýdanynda jasalǵan edi. Aýdandaǵy qojalyqtardyń birinen únemi dızeldi otyn urlanatyny týraly dabyl túsken. Ol Aqbulaq jáne Kishkenekól aýyldarynyń arasynda oraq jumystaryna tartylǵan tehnıkadan urlanǵan. Jedel-izdestirý is-sharalary júrgizilip, nátıjesinde sol sharýa qojalyǵynyń mehanızatory urlyq jasaý kezinde áshkerelendi. 58 jastaǵy er adam óziniń "K-701" traktoryna janar-jaǵarmaıdy toltyryp quıyp alyp, ony KamAZ júrgizýshilerine satýdy ádet qylǵan. Onyń osyndaı úsh urlyqqa qatystylyǵy anyqtaldy. Urlanǵan janar-jaǵarmaıdyń kólemi – 160 lıtr. Onyń 80-i alyndy, astyq egetin keshende jasyrylǵan janar-jaǵarmaıdyń bir bóligi kanıstrde bolǵan. Qazirgi ýaqytta atalǵan faktiler boıynsha sotqa deıingi tergeý júrgizilýde.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.