Senat depýtattary N.Júsip pen D. Nóketaeva Almaty oblysy Ile aýdanyna baryp, birinshi kezekte pandemııamen kúreste jergilikti bılik qabyldaǵan sharalarǵa, jańa áleýmettik nysandardyń jumysyna, mektepterdiń jańa oqý jylyna daıarlyǵyna nazar aýdardy.
Senatorlar «Jol kartasy-2020» baǵdarlamasy boıynsha aǵymdaǵy jóndeýden ótip jatqan sport kesheninde boldy. Depýtattar aýyl joldarynyń jaǵdaıymen de tanysty. Ákimdik ókiliniń aıtýynsha, bıyl salynýy tıis joldardyń jartysynan kóbiniń qurylysy aıaqtalǵan. Jalpy óńirde bıyl «Jol kartasy-2020» boıynsha 18 jobany iske asyrý kózdelip otyr. Olardyń qatarynda 4 aýyz sý qubyrynyń qurylysy jáne 10 kósheni jóndeý jumystary bar.
Depýtattar «7-20-25» jáne «5-10-20» memlekettik baǵdarlamasy boıynsha salynǵan kóppáterli úılerdiń sapasyn kórip shyqty. Senatorlar atalǵan úılerdi shynaıy muqtaj jandar alýy qajet ekenin aıtty. Sonymen qatar aýdan aktıvimen kezdesý barysynda qaıtalanýy múmkin kezekti pandemııaǵa qazirden daıyndalýdyń mańyzyna toqtaldy. Senator N.Júsip memleket indetpen kúreske qomaqty bıýdjet qarjysyn bólýde, sondyqtan jergilikti atqarýshy organdar olardyń maqsatty jumsalýyn qadaǵalaýy qajet ekenin eskertti.
* * *
Májilis depýtaty B.Smaǵul Almaty oblysyndaǵy «Baıankól» shekaralyq zastavasyna baryp, shekarashylardyń turmys-tirshiligimen tanysty.
Depýtattyń aıtýynsha, komandırler turatyn eski úılerge jóndeý júrgizilip, al qatardaǵy jaýyngerlerge arnalǵan úılerdiń qabyrǵalaryn jylý oqshaýlaǵysh materıaldarmen qaptap, astyna irgetas quıyp, qysta jyly, jazda salqyn, onyń ústine alystan kórinbeıtin, jasyryn, uqypty baspanalar daıyndalýda. Sonymen qatar sapar barysynda ol Raıymbek aýdany halqymen kezdesip, aýdan ortalyǵynda boı kótergen jańa ǵımarattardy jáne qazirgi kezde qyzý jumystar júrgizilip jatqan qurylys alańdaryna bardy. Qazirgi ýaqytta aýdan ortalyǵy Narynqol aýylynda jergilikti turǵyndarǵa arnalǵan 83 turǵyn úı salynýda. Al memlekettik qyzmetkerler ıgiligine 4 qyzmettik turǵyn úı tapsyrylmaq. Sondaı-aq depýtat «Jumyspen qamtý jol kartasy» negizinde Qyzylshekara aýylynyń aýyz sý júıesin qaıta jańǵyrtýǵa jáne Narynqol, Jańa-Tekes aýyldarynda kóshelerdi jaryqtandyrý jumystary bastalǵanyna erekshe nazar aýdardy. Aýdannyń ınfraqurylymy da jańǵyrýda. Munda jergilikti mańyzdaǵy joldar da jónge keltirilip, jańadan tóselýde.
* * *
Senat depýtaty D.Mýsın Semeı qalasyna sapary barysynda Abaı atyndaǵy mýzeıge bardy.
Qala ákimi senatorǵa taıaýda ǵana Abaı alańyn abattandyrý jumystary aıaqtalǵanyn, sonyń nátıjesinde bul jerde oıyn jáne sport alańdary ashylyp, jas taldar otyrǵyzylǵanyn aıtty. Sondaı-aq, aqyn eskertkishin jaryqtandyryp turatyn arnaıy qondyrǵylar ornatylǵan. Qalada Abaı atyndaǵy teatrǵa da jóndeý jumystary júrgizilip jatyr. Teatr kórkemdik jetekshisiniń aıtýynsha, ǵımarattyń tarıhı kelbeti tolyq saqtalady. Mereıtoı aıasynda aqyn mýzeıinde Abaı men balalaryna arnalǵan elimiz boıynsha alǵashqy eskertkish ornatylady dep josparlanyp otyr. Sonymen qatar D.Mýsın Abaı Qunanbaıulynyń 175 jyldyǵyna oraı óńirlerdiń Semeı qalasyn kórkeıtý týraly Úkimet tapsyrmasyn qalaı oryndap jatqanyna nazar aýdardy. Osyǵan oraı senator oblys ákimdigi bul máselege basa mán berip, atalǵan tapsyrmanyń oryndalýyn baqylaýǵa alý kerektigin atap ótti.
* * *
Májilis depýtaty I.Aronova Qostanaı oblysy boıynsha jańa oqý jylyna daıyndyq jaǵdaıymen tanysty.
Jergilikti bilim salasy mamandarynyń aıtýynsha, osy jyly 9,2 mlrd teńge qarjy bólinip, 130 nysanǵa kúrdeli jóndeý júrgizilgen. I.Aronova oblystyq ustazdar qaýymymen onlaın konferensııada qazirgi karantın jaǵdaıynda bilim berý jumysyn uıymdastyrý taqyrybyn talqylady. Málim bolǵandaı, barlyq mektepterde sabaq qashyqtyqtan oqytýdan bastalady. Ol úshin barlyq jaǵdaı jasalǵan. Alaıda, depýtat qashyqtyqtan oqytýda bilim berý sapasyna nuqsan keltirmeýge basa nazar aýdardy. Onlaın kezdesý barysynda ustazdar men olardyń otbasyn áleýmettik qoldaý jaıy da nazardan tys qalmady. Naqty aıtqanda, koronovırýs indetin juqtyrǵan muǵalimderdi saýyqtyrý máselesi áńgime ózegine aınaldy. Ustazdar qaýymy bıyl tuńǵysh ret bastaýysh synyptar úshin uıymdastyrylatyn «kezekshi synyptar» máselesine depýtat nazaryn aýdardy. Aıtýlarynsha, júktemeniń artýyna baılanysty eńbekaqy tólemine qatysty normatıvtik-quqyqtyq baza joq. Depýtat osy jáne basqa da ózekti suraqtardy quzyrly organdarmen birlesip sheshýge ýáde etti.
* * *
Májilistiń Agrarlyq máseleler komıtetiniń tóraǵasy B.Ospanov Shymkent qalasynda kásipkerlermen kezdesip, shaǵyn jáne orta bıznesti qoldaý máselesin talqylady.
Sonymen qatar ol «Tassaı» ındýstrıaldy aımaǵyna jáne «Ońtústik» erkin ekonomıkalyq aımaǵyna barǵan kezde mundaı kezdesýlerdiń qazaqstandyqtardyń ómirin jaqsartý úshin el basshylyǵy qoıǵan mindetterdi sheshýdiń mańyzdylyǵyn atap ótti. Depýtattyń aıtýynsha, bızneske jeńildetilgen nesıe berý tájirıbesin, shetelden ákelinetin keıbir materıaldarǵa bajdy tómendetý, sondaı-aq, kásiporyndardy óndiristik ınfraqurylymmen qamtamasyz etý máselelerine erekshe mán berý kerek. Depýtat kásipkerlerdiń memlekettik baǵdarlamalardy iske asyrýdyń negizgi baǵyttary boıynsha suraqtaryna jaýap berip, zań jobalary týraly jáne aldaǵy partııaishilik saılaý, ıaǵnı praımerız týraly aıtty.