Qazaqstan Konstıtýsııalyq Keńesiniń tóraǵasy Qaırat Mámıdiń basshylyǵymen konstıtýsııalyq baqylaý organdarynyń Eýrazııalyq qaýymdastyǵynyń otyrysy ótti.
Oǵan Armenııa, Belarýs, Ázerbaıjan, Qyrǵyzstan, Mońǵolııa, Reseı, Tájikstan jáne О́zbekstan konstıtýsııalyq ádilet organdarynyń ókilderi, qonaq retinde Konstıtýsııalyq sot tóreligi jónindegi dúnıejúzilik konferensııanyń Bas hatshysy Shnýts Dıýrr myrza qatysty.
Is-sharany ashqan Eýrazııalyq qaýymdastyq tóraǵasy Q.Mámı osy otyrys alǵash ret onlaın rejimde ótip otyrǵanyn aıtty. Oǵan áli de halyqaralyq sıpattaǵy úlken qaýip tóndirip otyrǵan COVID-19 koronavırýstyq pandemııasy sebep bolýda.
– Qaýymdastyq sheńberinde bizdiń konstıtýsııalyq-quqyqtyq saıasattyń ózekti máseleleri, sonyń ishinde qazirgi jahandyq syn-qaterge baılanysty máseleler boıynsha tájirıbe jáne tásilder almasýǵa múmkindigimiz bar. Bul, ásirese 30 tamyzda atap ótiletin Qazaqstan Respýblıkasy Konstıtýsııasynyń 25 jyldyq mereıtoıy jylynda asa mańyzdy, – dedi spıker.
Uıym músheleri quqyqtyq saladaǵy yntymaqtastyqtyń negizgi baǵyttaryn, jarǵylyq qujattardy odan ári jetildirý máselelerin, sondaı-aq Qaýymdastyqtyń Konstıtýsııalyq sot tóreligi jónindegi dúnıejúzilik konferensııanyń aldaǵy 5-kongresine qatysý máselelerin talqylady. Taraptar Dúnıejúzilik kongress aıasynda Qaýymdastyq otyrysyn ótkizý týraly sheshim qabyldady.
Azııalyq Konstıtýsııalyq sottar men balama ınstıtýttar qaýymdastyǵy jáne basqa da qaýymdastyqtarmen yntymaqtastyq máseleleri áńgimege túıtkil boldy. О́zara is-qımyldy kúsheıtý úshin Azııalyq qaýymdastyqpen yntymaqtastyq týraly Memorandýmǵa qol qoıý usynyldy.
Sonymen qatar delegasııa basshylary bir-birin óz elderinde bolyp jatqan is-sharalar men odan ári yntymaqtastyq josparlary týraly habardar etti.
Q.Mámı otyrysqa qatysýshylarǵa belsendi ustanymy, ortaq mindetterdi sheshýge daıyndyǵy úshin alǵysyn bildirip, 27 tamyzǵa belgilengen Qazaqstan Respýblıkasy Konstıtýsııasynyń 25 jyldyǵyna arnalǵan halyqaralyq beınekonferensııaǵa (kongreske) shaqyrdy.