Temir jol salasyn jetildirýge baǵyttalǵan "Temir jol kóligi týraly" QR Zańy jobasynyń Tujyrymdamasy ázirlendi. Onda tasymaldaý sharalaryn tasymaldaýshylardyń básekeli naryǵyna baǵdarlaý jáne osy prosestiń árbir qatysýshynyń róli, quqyqtary men mindetterin aıqyndaý eskerilgen.
Bul rette, jolaýshylarǵa qyzmet kórsetý standarttaryn engize otyryp, jolaýshylarǵa qyzmet kórsetý tásilderin qaıta qaraý kózdelgen. Halyqaralyq kólik dálizderin damytýdy eskere otyryp, konteınerlik tasymaldar boıynsha kórsetkishke qol jetkizýge múmkindik beretin ınfraqurylymǵa qoıylatyn talaptardy aıqyndaý, sondaı-aq júk tasymaldaýshylardy lısenzııalaý ınstıtýtyn jańǵyrtý jáne "QTJ "UK" AQ jergilikti aktilerine normatıvtik quqyqtyq aktiler mártebesin berý josparlanyp otyr.
Básekelestikti damytýdyń ózi tasymaldaýshylardyń jumys isteýine teńdeı emes jaǵdaı týyndatatyn kedergilerdi joıýǵa baryp tireledi.
Qazirgi kedergiler jeke júk tasymaldaýshylar men ulttyq júk tasymaldaýshynyń jumys isteýiniń teńsiz tarıftik sharttarynda jatyr. Sondyqtan munyń bári keńinen taldanady jáne birtindep túzetiledi.
Osylaısha, ulttyq júk tasymaldaýshy tómen (ózindik qunynan tómen) quny boıynsha qyzmet usyný arqyly jolaýshylardy tasymaldaýshylardy qarjylandyrady. Jeke júk tasymaldaýshylarda mundaı mindettemeler joq.
Sóıtip naryq qatysýshylary úshin is júzinde birdeı básekelestik jaǵdaı jasalady.
Osyǵan baılanysty Tujyrymdamada Ulttyq júk tasymaldaýshynyń jolaýshylar tasymaldaýshylaryn qoldaý júıesin qurý, sondaı-aq tartym túrleri boıynsha tarıfterdi saralaý arqyly tarıf belgileý negizderin ózgertý jóninde birqatar ınstıtýsıonaldyq negizder qabyldaý kózdelip otyr.
Standarttarǵa keletin bolsaq, qoldanystaǵy zańda vokzaldar men poezdarda jolaýshylarǵa qyzmet kórsetý standarttaryn reglamentteıtin normalar, sondaı-aq tasymaldaý jónindegi qyzmetterdi tutynýshylar retinde jolaýshylardyń múddelerin qorǵaý jónindegi normalar joq.
Sondyqtan qyzmet kórsetý standarttaryn engizýdiń negizgi mindetteri:
- ár túrli sýbektilerdegi temir jol kóligi qyzmetkerleriniń is-áreketterin birizdendirý;
- jolaýshylar úshin barynsha túsinikti minez-qulyq tártibin qamtamasyz etý jáne olardyń quqyqtary men mindetterin túsindirý;
- temirjol kóligi qyzmetkerlerin ashyq jáne obektıvti baǵalaý úshin negizder jasaý;
- jolaýshylarǵa qyzmet kórsetýdiń biryńǵaı sapasyna qol jetkizý (poezdardyń keshigýi kezinde mindetti sms habarlaýdy engizý), bıletteýdiń qazirgi zamanǵy júıesi;
- jumys prosesteri men rásimderin ońtaılandyrý;
- kórsetiletin qyzmetterdiń sapasy men qurylymyna, atap aıtqanda jumsaq almaly-salmaly múkámmaldyń sapasyna, aýa baptaý júıeleriniń bolýyna jáne basqa da qosymsha qyzmetterge qoıylatyn talaptardy bekitý.
Jolaýshylardy tasymaldaý erejelerinde kórsetilgen jolaýshylarǵa qyzmet kórsetýdiń ózindik tártibi standart bolady. Alaıda, jolaýshylardyń osy tártippen jazylǵan aqparatty jáne normalardy jaqsy qabyldaýy úshin oǵan "Jol boıynda jáne vokzaldarda jolaýshylarǵa qyzmet kórsetý standarty" ataýyn berý josparlanýda. Onymen jolaýshylardy tanystyrý úshin atalǵan standartty poezdyń vagonyna ilý mindetteledi.