Júrgizýshi – Rýslan Igilik.
Búgin, 26 qazan kúni Almatydaǵy Balýan Sholaq atyndaǵy sport kesheninde bokstan XVII álem chempıonaty óziniń máresine jetti. Alataý baýraıyndaǵy shahardyń sharshy alańyn on kún boıy shaıqaltqan jahandyq jarys bıylǵy jyldyń qaharmandaryn anyqtady. Al mundaı ataqqa Qazaqstannyń – 4, Kýba men Ázerbaıjannyń – eki-ekiden, Reseı men Italııanyń bir-birden bylǵary qolǵap sheberleri qol jetkizdi.
Chempıonat fınaly ádettegideı asa jeńil salmaqtaǵylardyń shaıqastarynan bastalyp, birtindep kóterile berdi.
49 kıloǵa deıingi salmaqtaǵy qazaqstandyq Birjan Jaqypov pen aljırlik Mohammed Flıssıdiń arasyndaǵy jekpe-jekte bulardyń birinshisi basym tústi. Chempıon urysty bastan-aıaq bir deńgeıde ótkizdi. Onyń salqynqandy qımyly arasynda soqqylar serııasyna ulasyp ketip jatty. Sóıtip, alǵash ret 2005 jyly álem birinshiliginiń qola júldesin alyp úlgergen qyran araǵa segiz jyl salyp, ony altyn medalge aınaldyrdy. Esep – 3:0.
52 kıloǵa deıingi salmaqta reseılik Mısha Aloıan chempıon atanyp, osynyń aldynda, 2011 jyly Bakýde qol jetkizgen ataǵyn saqtap qaldy. Ol osylaısha qatarynan ekinshi márte top jardy. Onyń ózbekstandyq Jasýrbek Latıpovpen jekpe-jeginiń birinshi raýndy qarsylasynyń qanjyǵasynda ketti. Chempıon sodan keıin ǵana baryn salyp, sońǵy sátte tarazy basyn ózine aýdaryp áketti. Esep – 2:1.
56 kıloǵa deıingi salmaqta ázerbaıjan Djavıd Chelebıevtiń baǵy jandy. Ol reseılik Vladımır Nıkıtınmen shaıqasyn da tolassyz shabýylmen ótkizdi. Biraq qarsylasy da qaıtqan joq. Sol judyryq siltesterdiń arasynda tóreshiler Hazar teńiziniń jaǵasynan kelgen oǵlannyń soqqylary kóbirek dál tıdi dep eseptedi. Esep – 2:1.
60 kıloǵa deıingi salmaqta brazılııalyq Robson Konkeıkao men kýbalyq Lazaro Alvares Estrada altyn medaldyń taǵdyryn talqyǵa saldy. Bul de eki jaqtyń bir-birine ońaılyqpen berispegen tartysty talasy boldy. Degenmen, Bostandyq aralynyń qabylany birer soqqy bolsa da artyq jasap otyrdy. Sol artyqshylyq Alvaresti chempıon etip shyǵardy. Esep – 2:1. Osynyń arqasynda ol da qatarynan eki márte álem chempıony atandy.
64 kıloǵa deıingi salmaqta kúsh synasqan qazaqstandyq Mereı Aqshalov pen kýbalyq Iаsnıer Toledo Lopes básekesinde bulardyń alǵashqysynyń basymdyǵy birden baıqaldy. Teketires barysynda qarsylasyn udaıy orap ketip otyrǵan ol sońǵy raýndta eptep ese jiberip aldy. Esep – 3:0.
69 kıloǵa deıingi salmaqta qazaqstandyq Danııar Eleýsinov kýbalyq Arıspoıd Dıspaınmen urysynda utqanyna eshkimdi kúmándandyrǵan joq. Komanda kapıtany barlyq kezeńde de shaıqastyń tizginin óz qolynda ustap otyrdy. Esep – 3:0.
75 kıloǵa deıingi salmaqtaǵy qazaqstandyq Jánibek Álimhanuly ırland Djeıson Kýıgleımen baq synasty. Munda 20 jasar jas jigit Albıon jerinen kelgen qarsylasynan artyq kórindi. Ol bir ret tipti Djeısondy nokdaýnǵa da túsirdi. Sońynda tóreshiler Jánibektiń aıqyn basymdyqpen utqanyn pash etti – 3:0.
81 kıloǵa deıingi salmaqta kýbalyq Hýlıo Sezar de la Krýs ta qatarynan ekinshi márte chempıon atanǵandar qataryna qosyldy. Ol bul joly da dál Baký fınalyndaǵydaı qazaqstandyq Ádilbek Nııazymbetovpen qolǵap túıistirdi. О́kinishtisi, bizdiń baǵlan sondaǵy utylystyń qarymtasyn qaıtara almady. Esep – 2:1.
91 kıloǵa deıingi salmaqta ıtalıan Klemente Rýsso reseılik Evgenıı Tıshenkony talassyz jeńdi. Alǵashqy eki raýndta qarsylasynan kem túsken orys boksshysy sońǵy bólikte qımyldady. Biraq bári keshtik etti. Esep – 3:0.
91 kılodan aýyr salmaqta ázerbaıjandyq Magomedrasýl Medjıdov ta 2011 jyly alǵan chempıondyq ataǵyn saqtap qaldy. Onyń qazaqstandyq Ivan Dychkomen jekpe-jeginiń alǵashqy eki raýndy qarsylasynyń paıdasyna sheshilip turdy. Al úshinshi raýndta ol arasynan birneshe sekýnd salyp, básekelesin eki ret uryp qulatty. Bulardyń sońǵysy nokaýt bolyp shyqty. Sóıtip, Ivan Ázerbaıjan astanasyndaǵy chempıonattyń jartylaı fınalyndaǵy jeńilisi úshin bul qarsylasynan qarymta qaıtara almaı qaldy.
Sonymen, chempıonat bitti. Onda 4 altyn, 2 kúmis jáne 2 qola medal alǵan Qazaqstan quramasy komandalyq birinshi orynǵa shyqty. Ekinshi oryndy 2 altyn, 2 kúmis, 1 qola medalmen Kýba boksshylary jeńip aldy. Úshinshi orynǵa 2 altyn, 1 qola medali bar Ázerbaıjan komandasy ornalasty.
{youtube}1LycbvNM8hk{/youtube}
{youtube}4p2brNQnT1o{/youtube}
{youtube}TS6vkFQDfis{/youtube}