Eýropa odaǵy saılaý nátıjesiniń falsıfıkasııasy men narazylyqtardy kúshpen toqtatýǵa atsalysqany úshin 20 belarýstyq shendige qarsy sanksııa jarııalaý sheshimin maquldady.
Tizimdi Aleksandr Lýkashenko bastap tur. «Biz tizimde kim bolady, onyń sanyna qatysty jalpy kelisim daıyndadyq», dedi Chehııa Syrtqy ister mınıstri Tomas Petrıchek Berlındegi Eýroodaq syrtqy ister mınıstrleriniń kezdesýinde. Alaıda tehnıkalyq sebeptermen tizim eń jyldam degende kelesi aptada daıyn bolmaq.
Jýrnalısterdiń «Belarýs prezıdenti de Eýropaǵa kelýine tyıym salynatyndardyń qatarynda bola ma?» degen suraǵyna T.Petrıchek «Lýkashenko da tizimde bolýy kerek», dep jaýap berdi.
Lıtva Syrtqy ister mınıstri Lınas Lınkevıchıýs te A.Lýkashenko sanksııa tiziminde bolýy kerek degen pikirmen kelisip otyr. Alaıda Belarýs prezıdenti belgili sebeptermen tizimge qosylmaýy múmkin degen de boljamyn jasyrmady.
Grekııa men Kıpr elderi de Túrkııaǵa Jerorta teńiziniń shyǵysynda zańsyz energııa tasymaldaǵany úshin sanksııa jarııalaý kerek degen oıda. Naqty aıtqanda, eki memleket Belarýske qarsy is-qımylǵa qosylýǵa kelisimin berýi úshin aldymen Eýroodaqtan Túrkııaǵa sanksııa salý máselesin qarastyrýdy talap etip otyr.
Reseı Federasııasynyń prezıdenti Vladımır Pýtın beısenbide Belarýstegi jaǵdaı shıelenise tússe, kóteriliste kúsh qoldanylsa, polısııa jiberýge daıyn ekenin málimdedi. Degenmen qazir ondaı qajettilik kórip turmaǵanyn aıtty. Al Lınas Lınkevıchıýs bolsa bul zańsyz bolatynyn, Reseıge de bul máselege qatysty eskertý jasalýy keregin habarlady.
Ýkraına Syrtqy ister mınıstri Dmıtrıı Kýleba dıplomatııalyq áriptestikti birjola úzýge sebep kórmeıtinin, alaıda Eýropa odaǵynyń sheshiminen keıin sanksııa jóninde keńesip, sheshim qabyldaıtynyn habarlady. «Belarýstegi jaǵdaı turaqtalǵansha seriktestik pen baılanysty toqtata turý abzal» degen málimdeme jasady.