Búginde Taraz qalasyndaǵy aýlalardy abattandyrý men bilim berý mekemeleriniń jaǵdaıy óńirdegi ózekti máselelerdiń biri. Máselen, oblys ortalyǵyndaǵy "Alataý" shaǵynaýdanynda "Jumyspen qamtýdyń jol kartasy-2020" baǵdarlamasy boıynsha bes aýla abattandyrylýda. Atalǵan jumystarmen "Enerdjı-Taraz" jaýapkershiligi shekteýli seriktestigi aınalysýda. Jalpy, aýlalardy abattandyrý tolyq asfalttaý, kóshelerdi jaryqtandyrý, oryndyqtar men qoqys jáshikterin ornatý sharalaryn qamtıdy. Sondaı-aq, Tarazda balalar men sport alańqaılary salynyp, keńeıtilýde. Jambyl oblysynyń ákimi Berdibek Saparbaev aýlalardy abattandyrý jáne mektepterdiń jaǵdaıymen tanysyp, bul rette merdigerler men Taraz qalasynyń ákimi Aıtqazy Qarabalaevqa qurylys jumystarynyń sapasyna aıryqsha nazar aýdarý kerektigin tapsyrdy, - dep habarlaıdy Egemen.kz.
Oblys ákimi merdigerden jumys barysynda múgedektigi bar adamdardyń, qarttardyń jáne balalar arbalarynyń qozǵalysy úshin qolaıly jaǵdaılar jasalýy kerektigin atap ótti.
Degenmen, Taraz qalasyndaǵy eki úıdiń aýlalaryna abattandyrý jumystaryn júrgizip otyrǵan "NurInvestHoldıng" jaýapkershiligi shekteýli seriktestiginiń jumysyna turǵyndardyń kóńili tolmaı otyr. Qala turǵyndary jańa oryndyqtardyń qazirdiń ózinde synyp jatqanyn, eski átkenshekter men syrǵanaqtardyń boıaýsyz qalǵanyn, qurylys qoqystarynyń shashylyp jatqanyn aıtyp, shaǵymdanýda. Al, Berdibek Saparbaev qala turǵyndaryn barlyq olqylyqtardyń joıylyp, merdiger kompanııanyń jaýapkershilikke tartylatynyn jetkizdi. Budan bólek, "Enerdjı-Taraz" kompanııasy "Astana" shaǵynaýdanynda taǵy bes aýlany abattandyrý jumystaryn júrgizgen. Bul jumystarǵa Berdibek Saparbaev oń baǵasyn berip, turǵyndar da qurylysshylarǵa alǵys aıtty.
Osy ýaqytqa deıin "Astana" shaǵynaýdanynyń turǵyndary oblys basshylyǵynan fýtbol alańyn salyp berýdi, kóshelerdi jaryqtandyrýdy, shatyrly qoqys konteınerlerin ornatýdy jáne avtoturaqty keńeıtýdi suraǵan bolatyn. Turǵyndardyń barlyq ótinishteri eskerilgen. Buǵan qosa, atalǵan kompanııa óz qarajaty esebinen taǵy bir kórshi aýlany abattandyrý boıynsha jumystar júrgizip, balalar men sport alańqaılaryn salyp bergen.
Búginde Taraz qalasynda "Jumyspen qamtýdyń jol kartasy-2020" baǵdarlamasy aıasynda barlyǵy 163 aýlada abattandyrý jumystary júrgizilýde.
Jambyl oblysy