Memleket basshysy Qasym-Jomart Toqaev halyqqa Joldaýynda bilim salasy týraly sóz qozǵap, muǵalimder jalaqysy 25 paıyzǵa kóbeıetinin málimdedi, dep habarlaıdy Egemen.kz.
"Bilim salasyndaǵy basty máseleniń biri – ustazdar jalaqysynyń azdyǵy. Men 2021 jyldyń qańtar aıynan bastap muǵalimderdiń eńbekaqysyn 25 paıyzǵa kóterý jóninde sheshim qabyldadym. Jalaqy mólsheri aldaǵy ýaqytta da arta beredi. Bul maqsatqa aldaǵy úsh jylda qosymsha 1,2 trıllıon teńge bólinedi", dedi Q.Toqaev.
Sondaı-aq Prezıdent qashyqtan bilim berý júıesin jetildirýdi tapsyrdy.
"Koronavırýs indetiniń saldarynan dúnıejúzindegi mektep oqýshylary men stýdentterdiń basym kópshiligi qashyqtan oqýǵa kóshti. Bul jumystyń tásili men mazmunyn túbegeıli ózgertýde. Qashyqtan oqytý isin uıymdastyrýda Úkimettiń qatelikterin jaqsy bilemiz. Ashyǵyn aıtqanda, áli kúnge deıin naqty bir onlaın platforma joq. Muǵalimder, oqýshylar jáne ata-analar kúndiz-túni ýatsaptan bas kótermeıtin boldy. Tolyqqandy oqý úderisi úshin qajetti barlyq fýnksııalary bar birińǵaı onlaın berý platformasyn shuǵyl ázirleý qajet. Degenmen, sapaly bilim alý úshin ádettegideı sabaqqa qatysyp, muǵalimdermen jáne synyptastarmen aralasýdy orny bólek. Sondyqtan sanıtarlyq talaptardy saqtaı otyryp, bilim alýdyń qalyptasqan dástúrli tásiline ázirlengen jón. Bul ásirese, mektep úshin mańyzdy. Kúndelikti máselelerdi sheshýmen qatar balalardyń bárine birdeı múmkindik týǵyzý úshin júıeli sharalar qabyldaý qajet. Balalarymyz qaı jerde tursa da, qandaı tilde oqysa da, sapaly bilim alý qajet", dedi Prezıdent.