AQSh-tyń Saýda palatasy Qazaqstan men Amerıka Qurama Shtattary arasyndaǵy saýda-ekonomıkalyq yntymaqtastyqty odan ári keńeıtý maqsatynda Qazaqstandyq-amerıkandyq Iskerlik keńesi (USKZBC) óz jumysyn bastaǵany jaıly resmı túrde jarııalady. Bul týraly Egemen.kz mınıstrliktiń baspasóz qyzmetine silteme jasap habarlaıdy.
Iskerlik keńestiń basty mıssııasy - AQSh Saýda palatasynyń keńeıtilgen platformasy arqyly eki el arasyndaǵy ekonomıkalyq baılanysty odan ári tereńdetý. Keńes tóraǵasynyń qyzmetin Qazaqstan ekonomıkasyna eń iri ınvestor bolyp tabylatyn Chevron kompanııasy atqarady. Keńestiń hatshylyǵy Vıse-prezıdent Hýsh Choksıdiń jalpy basshylyǵymen AQSh Saýda palatasynyń arnaıy aýmaqtyq departamentinde ornalasady.
Saýda palatasynyń habarlamasynda Qazaqstan men AQSh arasyndaǵy taýar aınalymy jylyna shamamen 2 mıllıard AQSh dollaryn quraıtyny jáne aýyl sharýashylyǵy, energetıka, taý-ken óndirisi jáne ınfraqurylym sekildi salalarda ózara saýdanyń odan ári ósýine úlken múmkindikter bar ekendigi aıtylǵan. Qazirgi ýaqytta Qazaqstanda 700-den astam amerıkandyq kompanııalar jumys isteıdi.
AQSh Saýda palatasynyń Vıse-prezıdenti Maıron Brıllıant atap ótkendeı, eki el arasyndaǵy dıplomatııalyq qatynastardyń ornaǵanynyń 30 jyldyǵy qarsańynda uıym ekijaqty saýda-ekonomıkalyq yntymaqtastyqty damytýǵa belsendi qatysýǵa nıetti.
"Qazaqstandyq-amerıkandyq Iskerlik keńestiń AQSh Saýda palatasy quramyna kirýi bıznes qaýymdastyqty osy mańyzdy jáne strategııalyq qarym-qatynasty damytý úshin qajetti quraldarmen qamtamasyz etedi", - dedi Eýrazııa-Tynyq muhıty óńiri boıynsha Chevron kompanııasynyń prezıdenti Naıdjel Hırn.
Qazaqstannyń AQSh-taǵy Elshisi Erjan Qazyhanov "Biz AQSh Saýda palatasynda qazaqstandyq-amerıkandyq Iskerlik keńestiń ashylýyn Qazaqstan men AQSh arasyndaǵy saýda-ekonomıkalyq seriktestikti keńeıtýge qýatty serpin beretin jáne eki elde jańa jumys oryndary men múmkindikterdiń paıda bolýyna yqpal etetin tarıhı oqıǵa dep baǵalaımyz. Ortalyq Azııadaǵy jetekshi ekonomıka retinde Qazaqstan AQSh-tyń senimdi seriktesi bolyp qala beredi jáne amerıkalyq kompanııalarmen ózara tıimdi yntymaqtastyqty odan ári damytýǵa daıyn".
AQSh Saýda palatasy 3,5 mıllıonǵa jýyq amerıkandyq kompanııalardyń, 3 myń aımaqtyq palatalardyń múddelerin biriktiredi jáne shetelde 90-nan astam ókildigi bar álemdegi eń iri iskerlik uıym.