Bilim jáne ǵylym mınıstri Ashat Aımaǵambetov Memleket basshysynyń joldaýyna qatysty Facebook jelisinde pikir bildirip, otandyq bilim jáne ǵylym máselelerine erekshe nazar aýdarylatynyn aıtty, dep habarlaıdy Egemen.kz.
"Prezıdenttiń tapsyrmasymen úzdiksiz bilim berý tujyrymdamasyn ázirlep, qashyqtan oqytý platformasy jáne 6 jasqa deıingi búldirshinderdi balabaqshamen 100% qamtamasyz etý boıynsha jumys júrgizemiz.
Bul rette, aldaǵy ýaqytta memlekettik tapsyrysty balabaqshalarǵa qazirgi qoldanystaǵy júıedegideı bilim bólimderi nemese basqarmalary bólmeıdi", - dep jazdy ol.
Mektepke deıingi bilim berý uıymyna joldama alǵan balalardyń ata-analary kez kelgen balabaqshany tańdaıtyn bolady. Mınıstrdiń aıtýynsha, mundaı básekelestiktiń arqasynda kórsetiletin qyzmetterdiń sapasy da artýy tıis.
"Osy jyldyń qyrkúıek aıynan bastap Prezıdenttiń tapsyrmasymen pedagogterdiń synyp jetekshiligi jáne dápterlerdi teksergeni úshin qosymsha aqysy eki ese ósedi, sondaı-aq magıstrlik dárejesi úshin muǵalimder 27 myń teńge mólsherinde aı saıynǵy qosymsha aqy alady.
Sonymen qatar, 2021 jyldyń 1 qańtarynan bastap mektep, kolledj, qosymsha bilim berý jáne balabaqsha pedagogteriniń laýazymdyq jalaqysy taǵy da 25%-ǵa artady", - dedi mınıstr.
Prezıdent joldaýynda ǵylym salasyn damytý máselelerine toqtaldy. Bilim mınıstri osy rette birqatar jumys atqarylatynyn jetkizdi. Jas ǵalymdardyń ǵylym salasyna kelýin qamtamasyz etý úshin "Jas ǵalym" jobasy boıynsha 1000 zertteý granty bólinbek.
"Jer qoınaýyn paıdalanýshylar jumsaǵan shyǵyndarynyń 1%-yn ǵylym men tehnologııalardy damytýǵa baǵyttaý týraly normanyń iske asýyna qatysty máseleni ǵalymdar uzaq ýaqyt boıy aıtyp keledi. Endi osy másele de sheshimin tabatyn boldy.
Bul másele boıynsha sala ókilderiniń usynystary Prezıdenttiń tapsyrmasynda kórsetilgen. Endi bul qarajat jalpyulttyq ǵylymı basymdyqtardy negizge ala otyryp, bıýdjet arqyly ashyq túrde bólinedi. Bul ǵylymı zertteýler júrgizýge qosymsha baǵyttalatyn qomaqty qarajatqa qatysty ekenin atap ótken jón", - dep jazdy Bilim mınıstri.
Mınıstrdiń oıynsha, jyl saıyn 500 ǵalymnyń jetekshi ǵylymı ortalyqtarda ǵylymı taǵylymdamadan ótý bastamasy olarǵa sheteldik ǵalymdarmen yntymaqtastyq arqyly birlesken zertteýler júrgizýge jáne óz kezeginde olardyń tıimdiligin arttyrýǵa múmkindik beredi.
"Joldaýda ǵalymdardyń osy ýaqytqa deıin usynyp kelgen taǵy bir máselesi aıtyldy. Elimizdiń ǵylymı-tehnologııalyq damýy boıynsha jeke baǵdarlamalyq qujat ázirlenedi. Onyń negizgi erejelerin qalyptastyrý kezinde sala ókilderimen keńeıtilgen keńester ótkizemiz jáne onda halyqaralyq tájirıbe eskeriledi", - dep jazdy ol.