Búgin Taldyqorǵanda stýdentterge arnalǵan 288 oryndyq kópqabatty jańa jataqhana ǵımaraty paıdalanýǵa berildi. Elbasynyń «5 áleýmettik bastamasynyń» aıasynda jataqhana qurylysy ótken jyly qolǵa alynyp, bul maqsatqa oblystyq bıýdjetten 2,3 mlrd. teńge jumsaldy. Nysannyń ashylý saltanatyna oblys ákimi Amandyq Batalov qatysty, - dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Taldyqorǵan qalasynyń «Qaratal» shaǵyn aýdanynda uzaq jyldar boıy qaraýsyz qalǵan aıaqsyz qurylysty oblys ákimi A. Batalov kommýnaldyq menshikke ótkizip, stýdentter jataqhanasy retinde qaıta salýdy tapsyrǵan bolatyn. Sonyń nátıjesinde aınalasy bir jyldyń ishinde 13 qabatty, sáýleti kelisti jańa jataqhana boı kóterdi. Taldyqorǵandaǵy birden bir joǵary oqý orny I. Jansúgirov atyndaǵy Jetisý memlekettik ýnıversıtetiniń stýdentteri úshin berilip otyrǵan bul nysan bilimgerlerdiń ómir súrý jaǵdaıyn jaqsartyp, bilim sapasyn arttyrýǵa yqpal etetin qadam bolmaq.
Jataqhananyń ashylý saltanatynda oblys ákimi A. Batalov stýdent jastarǵa izgi tilegin bildirdi.
"Kezinde kásip ıesi qonaq úı salamyz dep, keıin qurylysyn aıaqsyz qaldyryp ketken nysannyń betony úgilip, armatýrasy tozyp, qaraýsyz jatqan bolatyn. Osy qurylysty stýdentter úıi retinde salsaq dep sheshim qabyldap, búgin, mine, paıdalanýǵa berip otyrmyz. Ǵımarattyń jobasyn marqum, belgili sáýletshi Aqmyrza Rústembekov jasady. Taldyqorǵan qalasynyń ajaryn ashatyn bul nysan jetisýlyq jastar úshin úlken syı dep bilemin. Endi bul jataqhana jalyndy, jigerli jastarymyzdyń óz úıindeı bolady. Biz jastarǵa úlken úmit artamyz. Osy ǵımartta bolashaqqa jol salyńdar, armandaryń oryndalsyn!" - degen oblys basshysy jumysty sapaly oryndaǵan «NSK Astana-Qurylys» JShS qurylys kompanııasyna alǵysyn bildirdi.
Munan soń I.Jansúgirov atyndaǵy JMÝ rektory Qýat Baımyrzaev, stýdenttik parlamentiniń spıkeri, quqyq jáne ekonomıka fakýltetiniń 4 kýrs stýdenti MadınaTurdash sóz alyp, jastarǵa degen qamqorlyǵy úshin el aǵalaryna ýnıversıtet ujymynyń atynan, stýdentterdiń atynan rızashylyqtaryn bildirdi.
Jınalǵan kópshilik ǵımarattyń ishin aralap, kitaphana, kınozal, ózindik jumys bólmesi, demalys bólmesi, ashana, jatyn bólmelerge kirip kórdi. Kelýshilerge «Bolashak Books» buryshy tanystyryldy. Ár bólmede stýdentterdiń erkin bilim alýy men demalýyna barlyq qajetti jaǵdaılar jasalǵan, tıisti qural-jadbyqtarmen tolyq qamtylǵan. Ázirge munda «Aınalaıyn» balalar úıiniń tárbıelenýshileri qataryndaǵy jáne ınternet jyldamdyǵy baıaý shalǵaı eldi mekenderden kelgen jalpy sany 13 stýdent ornalasty.
Atap ótsek, jyl sońyna deıin Taldyqorǵan qalasynda medısınalyq jáne polıtehnıkalyq kolledjderiniń 280 jáne 200 oryndyq, Qaratal aýdany Bestóbe aýylyndaǵy Bestóbe servıstik-tehnıkalyq kolledjiniń 50 oryndyq jatahanalary qoldanysqa berilip, taǵy 530 stýdent qýanyshqa bólenedi. Konstıtýsııa kúnine oraı oblys boıynsha 10 áleýmettik nysan ashylyp, Raıymbek aýdany, Narynqol aýylynda 33 jeke turǵyn úı, Taldyqorǵan qalasynda 60 páterlik turǵyn úı qoldanysqa berildi.