Saltanaty jarasqan stýdentter úıi (Taldyqorǵanda 13 qabatty jataqhana paıdalanýǵa berildi)

Taldyqorǵan qalasynyń «Qaratal» shaǵyn aýdanynda uzaq jyldar boıy qaraýsyz qalǵan aıaqsyz qurylysty oblys ákimi A.Batalov kommýnaldyq menshikke ótkizip, stýdentter jataqhanasy retinde qaıta salýdy tapsyrǵan bolatyn. Sonyń nátıjesinde aınalasy bir jyldyń ishinde 13 qabatty, sáýleti kelisti jańa jataqhana boı kóterdi. Taldyqorǵandaǵy birden bir joǵary oqý orny I.Jansúgirov atyndaǵy Jetisý memlekettik ýnıversıtetiniń stý­dent­teri úshin berilip otyrǵan bul nysan bilimgerlerdiń ómir súrý jaǵda­ıyn jaq­sartyp, bilim sapasyn arttyrý­ǵa y­qpal etetin qadam bolmaq. Jataqha­na­nyń ashylý saltanatynda oblys ákimi A.Batalov stýdent jastarǵa izgi tilegin bildirdi.

– Kezinde kásip ıesi qonaqúı salamyz dep, keıin qurylysyn aıaqsyz qaldyryp ketken nysannyń betony úgilip, armatýrasy tozyp, qaraýsyz jatqan bolatyn. Osy qurylysty stýdentter úıi retinde salsaq dep sheshim qabyldap, búgin, mine, paıdalanýǵa berip otyrmyz. Ǵımarattyń jobasyn marqum, belgili sáýletshi Aqmyrza Rústembekov jasady. Taldyqorǵan qalasynyń ajaryn ashatyn bul nysan jetisýlyq jastar úshin úlken syı dep bilemin. Endi bul jataqhana ja­lyn­dy, jigerli jastarymyzdyń óz úıindeı bolady, – dedi aımaq basshysy óz sózinde.

Jataqhananyń ashylýynda sóz alǵan I.Jansúgirov atyndaǵy Jetisý mem­leket­tik ýnıversıtetiniń rektory Qýat Baımyrzaev, stýdenter parlamen­ti­niń spıkeri, quqyq jáne ekonomıka fa­kýltetiniń 4 kýrs stýdenti Madına Tur­dash ta jastarǵa degen qamqorlyǵy úshin el aǵalaryna ýnıversıtet ujymy­nyń atynan, stýdentterdiń atynan rıza­shylyqtaryn bildirdi. Munan keıin jınalǵan kópshilik ǵımarattyń ishin aralap, kitaphana, kınozal, ózindik jumys bólmesi, demalys bólmesi, ashana, jatyn bólmelerge kirip kórdi. Kelýshilerge «Bolashak Books» buryshy tanystyryldy. Ár bólmede stýdentterdiń erkin bilim alýy men demalýyna barlyq qajetti jaǵdaı­lar jasalǵan, tıisti qural-jabdyq­tarmen tolyq qamtylǵan. Ázirge munda ­«Aı­nalaıyn» balalar úıiniń tárbıe­lený­shileri qataryndaǵy jáne ınternet jyl­dam­dyǵy baıaý shalǵaı eldi mekenderden kelgen jalpy sany 13 stýdent ornalasty.

– Taldyqorǵanda sonaý toqyraý jyldarynda ıeleri sala bastap, keıin bitirmeı tastap ketken qurylystyń turǵanyna jıyrma jyldan asqan. Qaraýsyz jatqan soń ártúrli adamdar úıir bolady. Oǵan qosa qalanyń sánin ketirip turǵan. Búgin osy qurylystyń ornyna stýdentterge arnalǵan záýlim jataqhana salynyp berilgenine qýanyp jatyrmyz. О́zimiz kezinde ınstıtýtta oqyǵanda jataqhana degendi bilgenimiz joq, bizge mundaı jaǵ­daı jasalǵan joq. Qazirgi jastarǵa oqı­myn dese, ózin ózi damytamyn dese barlyq múmkin­dikteri bar, – deıdi stýdentter úıi­niń sán-saltanatyna tań bolǵan Taldy­qorǵan qalasynyń turǵyny Dına Nurǵalıeva.

Aıtpaqshy, jetisýlyq stýdent jas­tar­­dyń jańa qonysqa kóshýi jalǵasa ber­­mek. Buıyrsa, jyl sońyna deıin Tal­dy­qorǵan qalasynyń medısınalyq jáne polı­teh­nıkalyq kolledjderiniń 280 jáne 200 oryndyq, Qaratal aýdanyndaǵy Bestó­be ser­vıstik-tehnıkalyq kolledji­niń 50 oryn­dyq jatahanalary qoldanysqa beri­lip, taǵy 530 stýdent qýanyshqa bólenedi.

– Men oqýǵa túskende maǵan jańa jataq­hanada turasyń dedi, biraq alǵashyn­da senbedim. Shynynda da qazir osy stýdentter úıinde tegin turyp jatyrmyn. О́te qýanyshtymyn. Bizde kitaphana, kınozaldardy aıtpaǵanda, tipti kir jýatyn mashınaǵa deıin bar. Endi biz eshteńege alańdamaı tek qana jaqsy oqýy­myz kerek, – deıdi Taldyqorǵan qala­syn­daǵy «Aınalaıyn» balalar úıiniń tárbıelenýshisi, I.Jansúgirov atyndaǵy JMÝ jýrnalıstıka bóliminiń 1 kýrs stýdenti Aıaýlym Qoıshybaeva.

Almaty oblysy