Túrkistan oblysy Ordabasy aýdany Shubarsý aýylynda jalpy aýmaǵy 15 gektardy quraıtyn «Shubarsý» jylyjaı aımaǵy ashyldy. Jylyjaı aımaǵynan jer telimin alyp, kásibin júrgizýge 63 azamat ótinim bildirgen. Sharýalarǵa memleket tarapynan 15 sottyqtan jer telimi berilýde. Olardyń ishinde 29 azamat nesıe alý arqyly jumysyn bastamaq. Bul týraly Egemen.kz oblys ákiminiń baspasóz qyzmetine silteme jasap habarlaıdy.
Nesıe alýshy azamattarǵa aýdandyq aýyl sharýashylyǵy bólimi, Kásipkerlik bólimi, «Atameken» Ulttyq Kásipkerlik Palatasy Ordabasy aýdandyq fılıaly men Kásipkerlerge qyzmet kórsetý ortalyǵynyń mamandary nesıe alý boıynsha keńes berip, qoldaý jumystaryn júrgizedi.
Sondaı-aq nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan «Eńbek» memlekettik baǵdarlamasyna sáıkes jańa bıznes-ıdeıalardy iske asyrýǵa arnalǵan memlekettik granttar berý tetigi de kózdelgen. Memlekettik grant alýǵa «Bastaý Bıznes» jobasy boıynsha kásipkerlik negizderine oqytý kýrsynan ótken nemese baǵdarlamanyń birinshi baǵyty sheńberinde qysqa merzimdi oqýdy aıaqtaǵan jumyssyz adamdar ótinim bere alady.
Ordabasy aýdanynda byltyrǵy jyly 20 gektar jylyjaı iske qosylǵan bolsa, bıylǵy jyldyń 7 aıynda bul kórsetkish taǵy 10,2 gektarǵa ulǵaıdy. Qazirgi tańda aýdandaǵy jylyjaılar kólemi 77,07 gektardy qurady. Onyń ishinde, 21 gektary – óndiristik, qalǵan 56,07 gektary fermerlik jylyjaılar. О́nim kólemi 3 340 tonnany qurady. Bul ónimder tek aýdan turǵyndaryna ǵana emes, Qazaqstannyń basqa qalalaryna da jetkizilýde. Jergilikti dıqandar Reseıge de 249 tonna kókónisti eksporttaǵan.