Sabaqtar ashyq aýada, sanıtarııa talaptaryn saqtaı otyryp ótkiziledi, - dep habarlaıdy Egemen.kz ákimdiktiń resmı saıtyna silteme jasap.
Prezıdent Q.Toqaev óz Joldaýynda jas urpaqtyń sporttyq jáne shyǵarmashylyq áleýetine meılinshe nazar aýdarý qajet ekenin atap ótti.
"Buqaralyq sportqa, dene shynyqtyrýǵa jáne balalarǵa basymdyq berý qajet. Ár oblysta, iri aýdan ortalyqtarynda sport seksııalary ashylýy kerek", - dedi Memleket basshysy.
"Astana jastary" jastar resýrstyq ortalyǵynyń aýla klýbtarynda balalardyń qyzyǵýshylyǵyn týdyratyn jańa sport seksııalary ashylýda.
"Sport alańdarynda 20-ǵa jýyq úıirme jumys isteıdi. Jekpe-jek túrleri, erkin kúres, karate, jaýyngerlik sambo, áskerı qoıan-qoltyq urys, dzıýdo seksııalaryna basymdyq berilgen. Aralas jekpe-jek MMA seksııasyn da ashýdy josparlap otyrmyz", - dedi "Astana jastary" KMM basshysy Shyńǵys Tileýlın.
Sonymen qatar oqýshylarǵa arnalǵan aýla klýbtarynda ashyq aýada dene shynyqtyrý jattyǵýlary ótkiziledi. Bul sabaqtar ásirese pandemııa kezinde suranysqa ıe boldy. Aýlalarda vorkaýt-alańdardyń ashylýymen bul baǵytty odan ári damytý josparlanýda.
"Biz strıt-vorkaýtty aýla klýbtaryna engizýmen ǵana shektelip qalmaımyz. Pandemııa kórsetkendeı, ashyq aýadaǵy aýla alańdaryn paıdalaný qajet. Jalpy, bizde kóptegen sporttyq sharalar kóshede ótkizilýde", - dedi "Astana jastary" KMM basshysy.
Balalarǵa arnalǵan bı úıirmeleri de bar. Zamanaýı bı toptary qurylýda. Barlyq sabaqtar kezinde sanıtarlyq qaýipsizdik erejeleri qatań saqtalady.
"Búginde Nur-Sultanda biz baqylaıtyn 21 aýla klýby bar. Olarda 2500 oqýshy sportpen aınalysady. Bizde 133 túrli saladaǵy jattyqtyrýshylar men oqytýshylar bar", - dedi Shyńǵys Tileýlın.
"Astana jastary" habarlaǵandaı, bıyldan bastap ortalyq aýla klýbtaryn damytýdyń 2023 jylǵa deıingi jańa tujyrymdamasyn iske asyrýda. Onyń basty mindeti - jastardy qyzyqtyratyn zamanaýı úıirmeler men baǵyttardy ashý. Eger qazirgi kezde aýla klýbtary tárbıelenýshileriniń deni 14 jasqa deıingi balalar bolsa, bolashaqta ortalyq eresek balalarǵa arnalǵan toptar qurýǵa nıetti.