Qazaqstandyq salalyq bilim jáne ǵylym qyzmetkerleri kásipodaǵy men onyń múshelik uıymdary respýblıkamyzdyń bilim berý uıymdarynda jumys isteıtin ustazdarǵa barlyǵy 1000-ǵa jýyq noýtbýk qurylǵysyn tabystady. Bul týraly Egemen.kz Salalyq kásipodaqtyń baspasóz qyzmetine silteme jasap habarlaıdy.
"Qashyqtan bilim berý prosesin tıisti deńgeıde uıymdastyrýǵa úles qosý maqsatynda "Qazaqstandyq salalyq bilim jáne ǵylym qyzmetkerleri kásiptik odaǵy" QB pedagogtardy qoldaý týraly sheshim qabyldaǵan bolatyn. Osy jumystardyń aıasynda jańa oqý jyly qarsańynda sala qyzmetkerleri – kásipodaq múshelerine jan-jaqty kómek kórsetý sharalary júzege asyryldy. Tek Jambyl oblysynda 336 birlik noýtbýk aımaqtaǵy bilim berý uıymdarynyń balansyna berilse, qalǵan óńirlerde noýtbýk qurylǵylary sala qyzmetkerleri - kásipodaq múshelerine qaıtarymsyz negizde syıǵa tartyldy",- delingen habarlamada.
Atap ótý kerek, noýtbýktar kópbalaly, az qamtylǵan ustazdarǵa, muqtaj pedagogtarǵa, sonymen qatar otbasynda mektep jasynda jáne stýdent birneshe balasy bar kásipodaq múshelerine berilgen. Budan bólek, birqatar oblysta Salalyq kásipodaqtyń múshelik uıymdary ustazdarǵa noýtbýk satyp alýy úshin qarjylaı kómektesken.
"Sonymen qatar keıbir aımaqtarda kásipodaq ınternet baılanysynyń ótemaqysyn tólep berýde. Máselen, Qaraǵandy oblysynda Saran aýdandyq kásipodaq komıteti 39 pedagogtyń, Abaı aýdandyq kásipodaq komıteti 50 kásipodaq múshesiniń ınternet tarıfiniń qunyn tóleýge materıaldyq kómek berdi. Qazirgi tańda Salalyq kásipodaq pen onyń múshelik uıymdary Respýblıkalyq "Mektepke jol" aksııasyna belsendi túrde qatysýda. Pandemııa kezeńinde kásipodaq múshelerin áleýmettik qoldaý jáne quqyqtyq qorǵaý jumystary jalǵasady" delingen habarlamada.