Almaty ákimi Baqytjan Saǵyntaev zııaly qaýym ókilderimen kezdesýde Ulttyń jańa sapasyn qalyptastyrý mindetteriniń mańyzdylyǵyn atap ótti, - dep habarlaıdy Egemen.kz.
Prezıdent Q.Toqaevtyń Qazaqstan halqyna Joldaýyn talqylaýǵa baılanysty qalanyń zııaly qaýym ókilderimen kezdesýinde Almaty qalasynyń ákimi B.Saǵyntaev "Memleket basshysy óziniń Joldaýynda pandemııa kezindegi jáne odan keıingi kezeńdegi jańa jaǵdaıda memleketimizdiń damýy týraly paıymdaıdy. El ahýalyna egjeı-tegjeıli taldaý jasaǵan dástúrli Joldaýdyń túıininde ulttyń jańa bolmysyn qalyptastyrýǵa ózgeshe sıpat, zor serpin berilgen" dep atap ótti.
"Bul ekonomıkany yntalandyrýǵa arnalǵan aýqymdy paket. Jańa syn-qaterlerge oraı memlekettik basqarý júıesin jetildirý. Áleýmettik rýhanı baǵdar alý. Memleket basshysy tujyrymdaǵandaı, "Jańarǵan ult qana jańǵyrǵan eldiń jetistigin jahan jurtyna tanyta alady". Sondyqtan Ulttyń jańa sapasyn qalyptastyrý mindetteri óte mańyzdy.
Búgin bizdiń áńgimemizdiń ult rýhanııatynan, óskeleń urpaqtyń boıynda ulttyq qundylyqtardy durys tárbıeleý máselesinen bastalǵany óte oryndy. Almatynyń zııalylary qazirgi kezeńde rýhanı damýdyń jańa paradıgmasyn qalyptastyrý boıynsha óte uqypty ári eleýli jumysty qalaı durys qurý týraly óz paıymdaýlarymen bólisetinine senimdimin. Bul rette Joldaýda Memleket basshysy "qazaq zııalylarynyń jańa kezeńdegi mindeti – ult bolmysynyń jańa qaǵıdattaryn ornyqtyrý» dep qashan da el aınasynyń ólshemi, baǵyt-baǵdary bolyp tabylatyn zııaly qaýymnyń mindetin taıǵa tańba basqandaı anyq kórsetken.
Shynynda da, álemniń ózgergenin kórip otyrmyz. Qazirgi kezeń – ózgerister men serpilister, irgeli izdenister kezeńi. Kez kelgen ultqa udaıy jańaryp, jańǵyryp otyrý tán.
Almaty ákimdiginiń pandemııadan túıgeni – bul ulttyń jańa sapasy, onyń básekege qabilettiligi men ıntellektýaldyq áleýeti, eń aldymen: densaýlyq saqtaý júıesine, bilim berý, aýqymdy sıfrlandyrý arqyly ınnovasııaǵa ashyqtyqqa, ulttyń ýaqyt talabyna beıimdelý qabiletine jáne ótkeni, búgingisi men bolashaǵy úshin óziniń joǵary jaýapkershiligin túsinýine baılanysty", - dedi óz sózinde B.Saǵyntaev.