Nur-Sultandaǵy "Shapaǵat" jáne "Álem" saýda nysandarynyń ákimshiligine iri kólemde aıyppul salynady, dep habarlaıdy Egemen.kz ákimdiktiń baspasóz qyzmetine silteme jasap.
Mobıldi top "Shapaǵat" jáne "Álem" saýda úılerin tekserý barysynda, satýshylar da, satyp alýshylar da talaptardy buzǵany anyqtaldy.
"Shapaǵat" saýda úıinde tekserýshiler dúńgirshekter janynda belgilerdiń joqtyǵyn, áleýmettik qashyqtyq pen maska rejıminiń saqtalmaǵanyn anyqtady. Sonymen qatar, mobıldi top ókilderi sanıtarlyq dárigerdiń qaýlysyna saı, ár 50 metr saıyn sanıtaızerler qoıylmaǵanyn atap ótti.
"Eki kireberistiń birinde temperatýra ólshenbeıdi. Zaldardyń birinde olar ornatylmaǵan, tek bir jerde ǵana bar. Ákimshilik sıpattaǵy sharalar qoldanatyn bolamyz. Kodekske sáıkes, eskertýler berilmeıdi, tek aıyppul sanksııalary taǵaıyndalady. Sýbektiniń sanatyna baılanysty: eger kishi bolsa – 200-300 AEK, eger iri bolsa – 1 600 AEK", - dedi Baıqońyr aýdandyq sanıtarlyq-gıgıenalyq qadaǵalaý bóliminiń basshysy Asyl Seraly.
Sondaı-aq, monıtorıng tobynyń ókilderi kelýshiler sany boıynsha eskertýler jasady.
"Ákimshilik kire beriste, zalda kúzet bar-joǵyn baqylaýy kerek; satýshylarmen nusqaýlyq ótkizý kerek", - dep atap ótti Asyl Seraly.
Bazar basshylary barlyq eskertýlerdi joıýǵa ýáde berdi.
"Álem" SÚ sanıtarlyq talaptar áldeqaıda muqııat saqtalǵan. Alaıda, ereje buzýshylyqtar bul jerden de tabyldy.
"Áleýmettik qashyqtyqty saqtaýǵa arnalǵan eshqandaı belgi joq, kelýshiler arasynda maska rejımi saqtalmaıdy. Sondaı-aq, satýshylar maskany durys taqpaǵan. Biz zaldan sanıtaızerler baıqamadyq, tek kire beriste ǵana ornatylǵan. Nátıjelerdi jergilikti polısııa qyzmetimen talqylaımyz, buzýshylyqtar týraly raport jasaımyz, ári qaraı shara qoldanamyz", – dep túsindirdi Asyl Seraly.
Sondaı-aq, sanıtarlyq-gıgıenalyq baqylaý basshysy nysandarda monıtorıngtik is-sharalar kún saıyn júrgizilip jatqanyn atap ótti. Alaıda, eń bastysy – erejelerdi saqtaý, óıtkeni qatań sharalardyń arqasynda ǵana koronavırýstyń taralýyn tolyǵymen boldyrmaýǵa bolady.
"Erejelerdi bári biledi, biraq buzady. Muny birneshe ret jasaıtyn nysandar bar. Eń aldymen, vırýstyq ınfeksııanyń taralýyn boldyrmaý úshin barlyq sanıtarlyq normalardy saqtaý kerek. Bul en birinshi maska rejımin saqtaý, óıtkeni vırýs aýa tamshylarymen beriletini belgili. Eger adamdar bir-birimen baılanysta bolsa, vırýs toqtamaıdy. Barlyq sanıtarlyq normalar, barlyq qaýlylar osy vırýstyń taralýyn boldyrmaý úshin qajet", – dep túıindedi sanıtarlyq-gıgıenalyq qadaǵalaý bóliminiń basshysy.