Bul týraly "Jas Otan" JQ 2025 jylǵa deıingi "Jastar-Otanǵa!" baǵdarlamasyn talqylaý maqsatynda ótkizilgen beınekonferensııada málim boldy, - dep habarlaıdy Egemen.kz.
Sońǵy bir aı kóleminde baǵdarlama jastar arasynda qyzý talqylanyp jatyr. Osy ýaqyt ishinde azamattyq ustanym, bilim berý, jumysqa ornalastyrý, turǵyn úımen qamtamasyz etý jáne tulǵalyq damý syndy 5 negizgi baǵyt boıynsha 4 myńnan astam usynys kelip tústi.
Kezdesý barysynda «Jas Otan» JQ jetekshisi Elnur Beısenbaev baǵdarlamada kórsetilgen pýnktterdi iske asyrý úshin óńirlik jáne aýmaqtyq jol kartalary ázirlenetinin atap ótti:
"Jaqyn arada talqylaý jáne usynys qabyldaý maqsatynda barlyq jol kartalary Jas Otannyń saıtynda (jasotan.kz) jarııalanatyn bolady. Sol sebepten de jastar tarapyna biz áli kóptegen usynystar kútemiz", - dedi uıym basshysy.
Jas kınorejısser, ssenarıst, New York Film Academy túlegi, "Qazaqstannyń 100 jańa esimi" jobasynyń jeńimpazy Aıdıe Aıdarbekov Almatyda jas kınorejısserler úshin qala kóleminde kóptegen baıqaýlar uıymdastyrylatynyn atap ótti.
"Biraq jumystyń sapaly bolýy úshin respýblıkalyq kınofestıvaldar ótkizýdi usynamyn. Sol festıvaldarda jas rejısserler óz jumystaryn usynyp qana qoımaı, tájirıbe jáne pikir almasa alady", - dedi jas rejısser.
Baǵdarlama jobasynda jas ǵalymdarǵa qatysty da bir qatar mindetter kórinis tapqan. Osy oraıda jas ǵalym, PhD, Qazaqstannyń Jas ǵalymdar alıansynyń negizin qalaýshy jáne tóraǵasy Ásııa Ermuhambetova:
"Meniń oıymsha, sońǵy ýaqytta ǵylymı ázirlemeler men zertteýlerge emes, startap-jobalarǵa kóp kóńil bólinýde. Jas ǵalymdarǵa arnalǵan baıqaılar kóptep uıymdastyrylýy kerek dep esepteımin. Sonymen qatar Qazaqstanda "Jas ǵalym" uǵymy áli kúnge deıin zańdy túrde bekitilmegen, sáıkesinshe ǵylym ókilderine qandaı da bir jeńildikter men qoldaý tetikteri qarastyrylmaǵan. Sonymen qatar, árbir JOO qabyrǵasynda stýdentterdiń zertteý daǵdylaryn damytý mańyzdy", - dedi.
Qorytyndy qujat – "Jastar-Otanǵa!" baǵdarlamasy "Jas Otan" Jastar qanatynyń V sezinde qabyldanady. Qazirgi ýaqytta joba respýblıka boıynsha talqylanýda.