Bala kezinde qııalshyl edi. Ushqysh bolsam deıtin. Qazbaýyr bulttardyń arasynda qalyqtaı ushyp, kókmunarly taýlar men kókoraıly orman-toǵaıdy, monshaqtaı móldiregen kólderdi kórgisi kelgen. Meıirimi mol adamdar mekendegen óńirlerdiń symbatyna súısinip, sholyp shyqsa shirkin...
Adamnyń oılaǵany bola bermeıtin tárizdi. Kindik qany tamǵan Podgornyı aýylynyń janynda bıik shoqy bar. Shoqy ústine shyqsańyz, Jaqsynyń jalpaq dalasy alaqanǵa salǵandaı kórinedi. Ásirese saryala kúzde kórgen jaqsy. San túske boıanyp, sary saǵym oınap turǵan keń dalada janaryńdy toqtatatyn qarasyn az. Quddy bireý ushy-qıyryna kóz jetpeıtin jalpaq dalany áldeneshe túrli boıaýmen boıap tastaǵandaı kórinetin. Osy bir sýret kókireginde jattalyp qalypty. Bala da bolsa dalanyń keńdigin túısingen. Sary saǵymnyń arǵy jaǵynda qandaı tirshilik bar eken, kimder turyp jatyr eken dep oılaıtyn. Bilmekke qumar kóńilmen tezirek erjetsem, kórýge múmkindik buıyrar deýshi edi.
Buıyrmady. Jetinshi synypta oqyp júrgende kóz aldy kireýkelenip, janar oty sýala bastady. Bul óńirde balalardyń kóz dárigeri de joq qoı. Aýdan, oblys ortalyǵynan medet izdegen. Biraq syrqattyń túp sebebi anyqtalmady. Anyqtalmaǵan soń emdeý de múmkin emes. Bala qııal kóńilde buıyǵyp qala berdi. Kók aspanda qyran qustaı zaýlamaq túgil qara jerdi nyq basyp júrýdiń ózi armanǵa aınaldy.
Áıtse de muqalǵan joq. Taǵdyrdyń salǵan isine tastaı berik boldy. Orta mektepti aıaqtaǵan soń massaj kýrsyna túsken. Az ýaqyttyń ishinde adam denesindegi aǵzaǵa áser etetin núktelerin, oǵan áser etý joldary sııaqty qyr-syryn meńgerip aldy. Tolaıym zerttegen adamǵa bul birtutas ǵylym eken. Endigi mamandyq osy tarapta bolǵan soń jatpaı-turmaı izdenýge týra kelgen. Ekinshi toptaǵy múgedek Aleksandr Fedorchýk osylaısha aýdan ortalyǵyndaǵy sport mektebiniń bildeı qyzmetkeri bolyp shyǵa keldi.
Jaqsy aýdanynda sport táp-táýir damyp, keń óris jaıyp tur. Buqaralyq sportqa jergilikti kásipkerler de kóńil bóledi. Jaqsydaǵy sport mektebi oblystaǵy mańdaıaldy ujymnyń biri. Ásirese boksshylar men balýandar aýdan atyn shyǵaryp tur. Álem chempıony Dına Jolamanovanyń jalǵyz ózi nege turady. Dınaǵa eliktegen boksshy qyzdar oblystyq, respýblıkalyq jarystarda top jaryp júr. Sashanyń mindeti – jattyqtyrýshylarmen birge sportshylardy daıyndaý. Jeńse meniń de úlesim bar degendeı shattyqqa bólenedi.
– Adam eshqashan unjyrǵasy túsip, moıymaýy kerek dep bilemin, – deıdi Sasha, – eshkimge masyl bolmaı, alǵa umtylsań ǵana tabysqa jetesiń. Men Jaqsynyń sportshylaryna janashyr jan retinde jan-tánimmen qyzmet etkendi qalaımyn. Olardyń jalaýy jelbirese, baptaýǵa atsalysqan meniń de mereıim ósip qalady. Bul jer jastardyń qajyr-qaıraty, kúsh-qýaty atoılap turǵan oryn. Sondyqtan sport mektebiniń qabyrǵasynyń ózinen-aq kókiregime qajyr-qaırat quıylǵandaı sezinemin.
Orda buzar otyzdaǵy azamat basyna túsken besbatpan júkpen jaǵalasyp-aq keledi. Jeńilmek emes. Qazir aq-adal jumysy arqyly aı saıyn táp-táýir eńbekaqy alyp otyr. О́ziniń aıtýyna qaraǵanda, janarynan jasqanyp, jer taıanyp qalsa, azamattyǵyna syn.
Bir kezde ózi kórgisi kelgen, syryn uqqysy kelgen saıyn dalanyń saıypqyran uldarymen birge eńbek etip jatqanyn taǵdyrynyń tamasha syıy dep biledi. Jaratqannan odan artyq ne tilesin?!
Aqmola oblysy,
Jaqsy aýdany