Bıylǵy 6 aıda elimizdegi qus fermalarynda salqyndatylǵan qus etiniń óndirisi jylyna 26 paıyzǵa, al qatyrylǵan et óndirisi 9 paıyzǵa ósti. Soǵan qaramastan shetelden keletin qus etiniń kólemi de artyp keledi. Bul týraly energyprom.kz habarlady.
– 2020 jyldyń qańtar-shilde aılarynda jańa soıylǵan nemese salqyndatylǵan qus etin óndirý kólemi 60,5 tonnaǵa ósti. Bul ótken jylǵy kórsetkishpen salystyrǵanda 26,2 paıyzǵa joǵary. Qatyrylǵan qus etiniń óndirisi de alty aıda 8,9 paıyzǵa ulǵaıyp, 66,5 myń tonnaǵa jetti, – deıdi energyprom.kz.
Qus etin óndirýden respýblıka boıynsha Almaty, Aqmola jáne Shyǵys Qazaqstan oblystary kósh bastap tur. Almaty oblysyndaǵy – «Kazros-Broıler» AQ, Aqmola oblysyndaǵy – «Makınsk qus fabrıkasy» JShS jáne Shyǵys Qazaqstan oblysyndaǵy – «Aıtas-MP» JShS-na qarasty kásiporyndar elimizdegi eń iri óndirýshilerdiń qataryna jatatynyn aıta ketý kerek. Aqmola oblysyndaǵy «Capital Projects LTD» JShS da qus eti men jumyrtqa óndirisindegi iri eksporttaýshylardyń sanatynda.
«Makınsk qus fabrıkasy» JShS jylyna 25 myń tonna qus etin óndiretin aýqymdy keshen. Jyl sońyna deıin kásiporynnyń 2-shi kezeńi iske qosylsa, óndiris eki ese ulǵaıýǵa tıis. Bul da ımport kólemin azaıtyp, ishki naryqty óz ónimimizben qamtýǵa yqpal etedi.
Jalpy, bıyl respýblıka boıynsha joǵaryda aıtylǵandarǵa qosymsha taǵy 8 qus fabrıkasy ashylýǵa tıis bolatyn. Jyl basynan beri Túrkistan oblysyndaǵy «Shymkent qus» pen Qostanaıdaǵy «KazAgros» kesheni ashyldy. Qalǵan altaýy kezek kútip tur.
Byltyr alty aıda óndirilgen ónimniń 4,5 paıyzy, ıaǵnı 5,2 myń tonna ónim syrtqy naryqqa shyǵarylsa, bıyl bul kórsetkish 2,8 paıyzǵa tómendegeni baıqalady.
Energyprom.kz habarlaǵandaı, tamyz aıynda elimizdegi dúken sórelerinde taýyq etiniń kılosy ortasha 928 teńgeden satylypty. Bul byltyrǵy baǵadan 4,6 paıyzǵa joǵary. Qus etiniń, jalpy et baǵasynyń qymbattyǵy boıynsha Aqtaý qalasy kósh bastap tur. Al eń tómengi baǵa Qostanaıda tirkeldi.