Bıyl farmasevtıka salasy aıtarlyqtaı qıyndyqtarǵa tap bolǵany belgili. Farmasevtıkalyq kásiptiń aldyna medısınalyq preparattar óndirisiniń kólemin ulǵaıtý jáne dári-dármekterdi ımportty almastyrý kýrsyn alý mindeti qoıylyp otyr, dep habarlaıdy Egemen.kz oblys ákiminiń baspasóz qyzmetine silteme jasap.
"Ámir jáne D" JShS bazasynda ótken kezdesýge qatysýshylar óńirdegi farmasevtıka salasyn damytýǵa qatysty oılaryn ortaǵa saldy.
Jambyl oblysynyń ákimi Berdibek Saparbaev óz sózinde farmasevtıka ónerkásibi strategııalyq mańyzy bar baǵyttardyń biri bolyp qala beretindigin atap ótti.
"Prezıdent Qasym-Jomart Toqaev "Jańa jaǵdaıdaǵy Qazaqstan: is-qımyl kezeńi" atty Joldaýynda farmasevtıka salasyn aıaqqa turǵyzatyn ýaqyt jetkenin basa aıtty. Bes jergilikti kompanııa dári-dármek óndirýmen aınalysady. Memlekettik qoldaýdy paıdalana otyryp, farmasevtıka naryǵyndaǵy jambyldyq preparattar úlesin arttyrýǵa jaǵdaı jasaý qajet", dedi aımaq basshysy.
Búgingi tańda farmbıznes mamandar men ınnovasııalyq jobalardyń tapshylyǵy saldarynan belgili bir qıyndyqtardy bastan ótkerýde. Tarazda S. Asfendııarov atyndaǵy Qazaq ulttyq medısına ýnıversıtetiniń fılıalynyń ashylýy osy máselelerdi sheshýge kómektespek. Ýnıversıtet rektory Talǵat Nurǵojınniń aıtýynsha, ýnıversıtet alǵashqylardyń biri bolyp Farmasııa mektebin ashqan.
"Mektep – ýnıversıtettiń ajyramas bólikteriniń biri. Onyń negizinde jasalǵan ǵylymı jobalar farmasevtıka salasyn jańǵyrtý jáne damytý úshin belsendi qoldanylady. Biz jergilikti farmasevtıkalyq kompanııalarmen yntymaqtastyq ornatýǵa jáne ǵylymı ázirlemeler boıynsha birlesip jumys isteýge daıynbyz", dedi Talǵat Nurǵojın.
Sondaı-aq oblys ákimi álemniń úzdik tájirıbelerine súıenýdiń tıimdiligin alǵa tartty. Oǵan tek otandyq qana emes, sheteldik ǵalymdar da tartylmaq. Kezdesýge beınebaılanys arqyly Lýnd ýnıversıtetiniń professory Kennet Person (Shvesııa) qatysty.
Ol Shvesııanyń farmasevtıka naryǵyndaǵy zamanaýı trendter, jergilikti óndirýshilerdiń róli týraly aıtyp berdi. Shvesııada iri kompanııalar ǵylymı ınstıtýttarmen qatar jumys isteıdi. Olardyń tájirıbesi jańa kompanııalarǵa beriledi. Bul baılanysty ornatýǵa jáne qoldaýǵa quramyna bıznes-trenerler kiretin arnaıy top kómektesedi. Osylaısha, Eýropa elinde farmasevtıkalyq kompanııalardy kez-kelgen qaýip-qaterden qorǵaýǵa kómektesetin júıe qalyptasqan.
Kásipkerlik jáne ındýstrııalyq-ınnovasııalyq damý basqarmasynyń basshysy Aspandııar Seısebaev bul salany damytý úshin oblystyń áleýeti zor ekendigin senimmen aıtty. Qazirgi tańda Qordaı aýdanynda Bilim jáne ǵylym mınıstrligi Ǵylym komıteti Bıologııalyq qaýipsizdik problemalary ǵylymı-zertteý ınstıtýtynyń janynan vaksına óndiretin bıofarmasevtıkalyq zaýyt salynýda. Jobalyq qýaty bıofarmasevtıkalyq preparattardyń 60 mıllıon dozasyn óndirýge qaýqarly zaýytta 65 jańa jumys orny qurylmaq.
Osy saladaǵy iri kompanııalardyń biri "Ámir jáne D" JShS de iri jobany qolǵa alýda. Kompanııa dırektory Qarlyǵash Qaımoldaeva saqtaý qoımalary bar farmasevtıkalyq óndiris kesheniniń qurylysy týraly aıtyp berdi. Onda Ekspress-testiler men medısınalyq buıymdar shyǵarylatyn bolady. Jospar boıynsha onyń qurylysy bıyl aıaqtalýy tıis. Jobanyń jyldyq qýaty – 15 mıllıon ekspress-test, 1,5 mıllıon baqylaý eritindisi jáne 50 myńǵa jýyq zararsyzdandyrýǵa arnalǵan orama.
Jańa óndiris kesheninde 200-den astam jumys orny ashylady dep kútilýde.
"SuperPharm" JShS de óndirisin keńeıtýdi josparlap otyr. Seriktestik dırektory Qaırat Qaımoldaevtyń aıtýynsha, shyǵarylatyn ónim túrleriniń sany artpaq.
Kezdesý barysynda Qarlyǵash Qaımoldaeva farmasevtıka naryǵyndaǵy jaǵdaıdy jaqsartý boıynsha usynystaryn ortaǵa saldy. Berdibek Saparbaev atalǵan máselelerdiń barlyǵy respýblıkalyq deńgeıde kóteriletinine sendirdi.
"Búgin biz farmasevtıka ónerkásibin damytý úshin barlyq alǵysharttardyń bar ekenine kóz jetkizdik. Osy oraıda "Qarapaıym zattar ekonomıkasy", "Bıznestiń jol kartasy – 2025" baǵdarlamalaryn paıdalaný kerek. Degenmen, bul turǵydaǵy ózekti máselelerdiń biri – eshkim ınnovasııalyq jobalardy usynbaıdy. Farmasevtıkalyq klasterdiń damýy jańa tehnologııalardy qoldaný men bilikti kadrlardy tárbıeleýdi kózdeıdi. Sheteldik áriptestermen tájirıbe almasa otyryp, telemedısınany damytýǵa den qoıyńyzdar", dep sózin túıindedi Berdibek Saparbaev.
Kezdesý qorytyndysy boıynsha oblys ákimi Jambyl oblysynda farmasevtıka ónerkásibin damytý baǵdarlamasyn ázirleýdi tapsyrdy.