Májilis Tóraǵasy Nurlan Nyǵmatýlın Ońtústik-Shyǵys Azııa elderi qaýymdastyǵynyń Parlamentaralyq Assambleıasynyń 41-shi Bas Assambleıasyna (ASEAN PAA) qatysty. Bul aýqymdy forým beınekonferensııa rejiminde ótti, dep habarlady Májilistiń baspasóz qyzmeti.
ASEAN PAA Bas Assambleıasynyń plenarlyq otyrysynda sóz sóılegen Májilis Spıkeri álemdik jetkizý tizbekterin qalpyna keltirýdiń, qazirgideı kúrdeli geosaıası jaǵdaılarda kólik-logıstıkalyq baǵyttardyń ashyqtyǵy men qaýipsizdigin qamtamasyz etýdiń mańyzdylyǵyn atap ótti.
– Osy oraıda Elbasy Nursultan Ábishuly Nazarbaevtyń búkil Eýrazııa qurlyǵynda seriktestik qurý týraly Úlken Eýrazııa strategııalyq ıdeıasy erekshe ózekti bolyp otyr. Saýda-ekonomıkalyq jáne ınvestısııalyq yntymaqtastyqty tereńdetý úshin Eýrazııalyq ekonomıkalyq odaq jelisi boıynsha ASEAN-men ózara is-áreketti damytý áleýetti bolyp tabylady, – dedi Nurlan Nyǵmatýlın.
Májilis Tóraǵasynyń aıtýynsha, osy formattaǵy ekonomıkalyq baılanystardy nyǵaıtý kontınent elderiniń damýyna, ekonomıkalyq ósýine jáne azamattardyń ál-aýqatynyń artýyna qýatty serpin bere alady.
670 mıllıonǵa jýyq halqy bar ASEAN, ishki jalpy ónimi 3,5 trln AQSh dollaryn jáne syrtqy saýda aınalymy 4,5 trln AQSh dollaryn quraıtyn eń iri aımaqtyq uıymdardyń biri.
Memleket basshysy Qasym-Jomart Toqaev aımaqtaǵy halyqaralyq uıymdarmen yntymaqtastyqty damytýǵa erekshe mán beretinin aıtqan Nurlan Nyǵmatýlın Ońtústik-Shyǵys Azııa elderimen qarym-qatynasty nyǵaıtý jáne ASEAN-men baılanysty keńeıtýdi Qazaqstannyń syrtqy saıasatynyń basym baǵyttarynyń biri dep atady.
Sonymen qatar Májilis Tóraǵasy parlamenttik dıplomatııanyń halyqaralyq yntymaqtastyqtyń tıimdi tetikterin qurýda jáne aımaqtyq jáne kontınentaldy deńgeılerde ortaq sheshimder tabýda aıtarlyqtaı áleýetke ıe ekendigine senim bildirdi.
Aıta ketý kerek, ASEAN PAA 41-shi Bas Assambleıasynyń otyrysy Hanoı qalasynda uıymdastyryldy, onyń qazirgi prezıdenti Vetnam Ulttyq Assambleıasynyń Tóraǵasy.
Sondaı-aq kún tártibine sáıkes beıbitshilik pen qaýipsizdikti qamtamasyz etý, Parlamenttiń COVID-19-dan keıin aımaqtaǵy yntymaqtastyq pen ekonomıkany qalpyna keltirýdegi róli, jumysshy áıelder úshin jumys pen kiristi qamtamasyz etýde Parlamenttegi áıelderdiń rólin arttyrý, ASEAN PAA jas Parlament ókilderiniń beıresmı kezdesýi týraly máseleler qaraldy.