Búgin Memlekettik qyzmet isteri agenttiginde memlekettik kórsetiletin qyzmetter sapasynyń mańyzdy máselelerine arnalǵan beınekonferensııa ótti, dep habarlaıdy Egemen.kz.
Jınalysqa Agenttik Tóraǵasynyń orynbasary D.M. Jazyqbaev, ortalyq memlekettik jáne jergilikti atqarýshy organdardyń, qoǵamdyq jáne úkimettik emes uıymdardyń, «Ulttyq aqparattyq tehnologııalar» AQ, «Azamattarǵa arnalǵan úkimet» Memlekettik korporasııasy KEAQ ókilderi qatysty.
Jınalys barysynda buzýshylyqtardy ózindik anyqtaýy jáne aldyn alýy, ákimshilik kedergiler, karantın kezindegi memlekettik qyzmetterdi kórsetý boıynsha jumystyń nashar uıymdastyrylýy, zańsyz deldaldyq qyzmet kórsetý, aqparattyq júıelerdegi tehnıkalyq olqylyqtar, «elektrondyq úkimet» portalyndaǵy qoljetimsiz qyzmetter boıynsha ortalyq memlekettik jáne jergilikti atqarýshy organdardyń tıimsiz jumysy qarastyryldy.
Tizilimge sáıkes 87,6% (694 qyzmettiń 608 túri) elektrondyq túrde kórsetilýi tıis. Alaıda, Agenttik 68 qyzmettiń qoljetimsizdigin anyqtady (BǴM – 13, Qarjymıni – 13, Eńbekmıni – 11, AShM – 8, EGTRM – 5, Qorǵanysmıni – 4, IIM – 4, Ádiletmıni – 2, DSM – 2, UEM – 2, IIDM – 1, MSM – 1, Energetıkamıni – 1, JS – 1). Memlekettik organdardyń qysqa merzimde elektrondyq qyzmetterin portalda, onyń ishinde «Tyńdaý» jobasy aıasynda túsken qoljetimdiligin qamtamasyz etý týraly Agenttik Basshysynyń orynbasary – Darhan Jazyqbaev atap ótti.
Agenttiktiń Memlekettik kórsetiletin qyzmetter departamentiniń dırektory Ildar Ýısýmbaev jınalys barysynda sóılegen sózinde ortalyq memlekettik jáne jergilikti atqarýshy organdar memlekettik qyzmetter salasyndaǵy buzýshylyqtardyń paıda bolý sebepteri men jaǵdaılaryn joıý boıynsha júrgizilgen jumys óz deńgeıinde bolmaǵanyn atap ótti. Nátıjesinde byltyrǵy jyldyń osy kezeńimen salystyrǵanda bıylǵy jyldyń basynan bastap qyzmet kórsetýshiler jibergen buzýshylyqtar sany 35% artty (2020 jyl – 103 myń, 2019 jyl – 65 myń).
Sondaı-aq memlekettik organdardyń memlekettik qyzmetterdi kórsetý kezinde qaǵazbastylyq pen ákimshilik kedergiler jasaý, jergilikti jerdegi memlekettik qyzmetshiler qashyqtyqtan jumys jasaý rejımine tolyqqandy kóshýdi qamtamasyz etpegendigi týraly faktileri atap ótildi, osyǵan baılanysty, memlekettik qyzmetterdi kórsetý merzimderi buzyldy, memlekettik qyzmetterdi kórsetý tártibin retteıtin biryńǵaı normatıvtik quqyqtyq aktilerdi ýaqtyly qabyldaý men kúshin joıý oryn aldy.
Agenttik tóraǵasynyń orynbasary Darhan Jazyqbaev Memleket basshysynyń Joldaýynda halyqtyń elektrondyq servıstermen is-qımylyn jeńildetý úshin bıometrııany memlekettik qyzmetter deńgeıinde jáne jeke bızneste keńinen qoldaný qajet ekendigin atap ótti.
«Elektrondyq qyzmetterge degen kúnnen kúnge kóbeıip jatqan suranysty eskere otyryp, ýákiletti organ ESQ qashyqtyqtan alýdy smartfondar arqyly júzege asyrýdy pysyqtaý qajet dep paıymdaımyz. Sondaı-aq suranysqa ıe qyzmetterdi «elektrondyq úkimet» portalynyń mobıldi qosymshasy arqyly kórsetýdi qarastyrý qajet.
Memlekettik qyzmetter salasyn sıfrlandyrýǵa anyqtamalardy jáne qyzmetterdi qaǵaz túrindegi balamalylyǵyn joıý da óz septigin tıgizedi»- dedi D.Jazyqbaev.
Jınalys sońynda ortalyq memlekettik jáne jergilikti atqarýshy organdarǵa, «UAT» AQ, Memlekettik korporasııaǵa anyqtalǵan buzýshylyqtardy joıý boıynsha, memlekettik qyzmetterdi kórsetý sapasyn arttyrý boıynsha jumystardy kósheıtý, sondaı-aq halyqpen keri baılanysty jasaý jáne áleýmettik jelilerde olarǵa jedel boıynsha áreket etý boıynsha naqty usynymdar berildi.