«Egemen Qazaqstan» gazeti búgingi materıalynda «QazMunaıGaz»-dyń 2019 jylǵy turaqty damýy týraly esebine sholý jasap, kompanııanyń áleýmettik jaýapkershiligi máselesin talqylaıdy.
«QazMunaıGaz» AQ-ǵa qarasty kompanııalar toby áleýmettik jaýapkershilikti arttyryp, jumysshylaryna laıyqty eńbek sharttaryn usyný úshin úsh baǵyttan turatyn «Joǵary ónimdilik mádenıeti» atty baǵdarlama ázirlenip otyr. Bul baǵyt ujymdyq mádenıet, kóshbasshylyq jáne HR-quzyrettilikti damytýǵa baǵyttalǵan mindetterden turady. Jalpy, QMG 2019 jyly jumysshylardy áleýmettik qoldaýǵa 22 mlrd teńge qarajat jumsaǵan.
«Eldegi iri jumys berýshiniń biri retinde, jumysshylar men kásipodaqtar arasyndaǵy seriktestik qaǵıdatyna súıene otyryp, biz áleýmettik baǵytty ustanamyz. Biz ónimdi jumysqa, laıyqty jumys pen jaqsy eńbek sharttaryn qamtamasyz etýge, adamnyń eńbek quqyqtary men adamı quqyqtaryn saqtaýǵa, aımaqtar men qoǵamnyń damýyna kómektesýge talpynamyz. 2019 jylǵy «QazMunaıGaz»-dy transformasııalaý baǵdarlamasynyń aıasynda «Joǵary ónimdilik mádenıeti» atty bastama iske qosylǵan bolatyn», delingen kompanııanyń esebinde.
Ulttyq kompanııa tek jumysshylaryna ǵana qoldaý kórsetip qoımaıdy. Esepke súıensek, 2019 jyly QMG men onyń enshiles kompanııalary jer qoınaýyn paıdalanýǵa arnalǵan kelisimsharttarynda óndiristik qatysý óńirin damytýǵa jáne halyqtyń muqtaj toptaryna áleýmettik kómek kórsetýge eleýli aqshalaı qarajat bólipti. Kompanııalar qarajatty jergilikti atqarýshy organdarǵa aýdarady, al olar óz kezeginde qarajatty halyqtyń qajetine jaratady. О́tken jyly osyndaı áleýmettik qoldaýdyń kólemi shamamen 7,6 mlrd teńgeni qurady, onyń ishinde:
«О́zenmunaıgaz» AQ Mańǵystaý oblysynyń ınfraqurylymyn damytýǵa áleýmettik baǵdarlamalar qoryna 1,2 mlrd teńge bóldi.
«Embimunaıgaz» AQ 2019 jyly Atyraý oblysy Qyzylqoǵa aýdany Muqyr aýylynda 424 oryndyq orta mektep qurylysyna 131 mln teńgeden astam qarjy bóldi.
«Mańǵystaýmunaıgaz» AQ óńirdiń áleýmettik-ekonomıkalyq damýyna jáne Mańǵystaý oblysynyń ınfraqurylymyn damytýǵa 3,4 mlrd teńge somasynda qarjylaı qoldaý kórsetti.
«QazMunaıTeńiz» TMK JShS Mańǵystaý oblysyndaǵy «Atajoly» avtojolyn qaıta jóndeýdi qarjylandyrýǵa 388 mln teńge somasynda úles qosty.
«Pavlodar munaı-hımııa zaýyty» JShS Pavlodar qalasyndaǵy jekelegen sport túrleri men sport is-sharalaryna 447 mln teńge somasynda qoldaý kórsetti.
«Qazgermunaı» BK JShS Qyzylorda qalasyndaǵy Jastarǵa qyzmet kórsetý ortalyǵynyń qurylysyna 1 465 mln teńge kóleminde qarjy bóldi, salym 2018-2019 jyldar aralyǵynda áleýmettik-ekonomıkalyq damytý boıynsha esepteldi.
«Qazaqoıl Aqtóbe» JShS óńirdi jáne Aqtóbe oblysyndaǵy ınfraqurylymdy damytýǵa 120 mln teńge bóldi.
Budan basqa, QMG toby Úkimet tapsyrmasy sheńberinde Túrkistan qalasynyń ınfraqurylymyn (7 000 oryndyq stadıon, 1 000 oryndyq kongress-holl jáne amfıteatrdyń qurylysy) damytýǵa 22,8 mlrd teńge bóldi, onyń ishinde: QMG – 14 mlrd teńge, «QazTransOıl» AQ – 2,2 mlrd teńge, «QazTransGaz» AQ – 5,7 mlrd teńge.