«Apat aıtyp kelmeıdi», buǵan keshegi jer-jahandy tarynyń qaýyzyna syıǵyzǵandaı áp-sátte bir ýys etip búristire qoıǵan indet dálel. Múıizi qaraǵaıdaı alpaýyt memleketterdiń shańyraǵy shaıqalǵan tusta biz de talaı shyǵynǵa ushyradyq – aıtýly azamattardan aıyryldyq, otandyq medısına salasyndaǵy kem-ketikter men jetispeýshilikterdiń beti ashyldy.
Indettiń ekinshi tolqyny bola ma, joq pa – belgisiz, alaıda qandaı jaǵdaıǵa da daıyn bolý qajettigi mańyzdy. Osy oraıda elimizde kúzde oryn alýy yqtımal indettiń ekinshi tolqynyna daıyndyq jumystary júrýde.
Jalpy 3334 adam vırýs juqtyryp, 2612 naýqas aıyqqan, ıaǵnı naýqastardyń 80%-y saýyǵyp shyqqan Mańǵystaý oblysynda sońǵy onkúndikte birde-bir koronavırýs ınfeksııasyn juqtyrýshy tirkelmegen. Endigi kezekte aımaqta koronavırýstyq ınfeksııanyń ekinshi tolqynynyń aldyn alý jospary jasaqtalyp, indetke qarsy daıyndyq jumystary júrgizilýde.
– Mańǵystaýda epıdemııalyq ahýalǵa sáıkes 170 adamǵa arnalǵan 9 ınfeksııalyq stasıonar bar. Rezervtegi 11 ınfeksııalyq stasıonarda 1835 tósektik oryn daıyn. Kadr rezervi jasaqtaldy. Qazirgi ýaqytta 183 dáriger daıyndaldy, dese de qajettilik 75 dárigerdi quraıdy. Al Aqtaý qalasynda 200 oryndy tez qurastyrmaly modýldik ınfeksııalyq aýrýhanasy salynyp jatyr. Barlyq qural-jabdyqtarmen qamtamasyz etilgen. Qazan aıynda ashylady dep kútilýde, – deıdi oblystyq densaýlyq saqtaý basqarmasynyń basshysy Jamal Jamanbaeva.
Basqarma basshysynyń aıtýynsha, óńirdiń medısına mekemelerin dári-dármekpen qamtamasyz etý maqsatynda jumystar jolǵa qoıylǵan.
– Qazirgi ýaqytta oblys kólemindegi ınfeksııalyq jáne provızorlyq stasıonarlarda 30 myńnan astam antıkoagýlıanttar geparın, kleksan, frakısparın, bakterııaǵa qarsy 2 myńnan astam sef-4, 35 myń sef-3, 40 myńǵa jýyq seftazıdım, 8 myńǵa jýyq azıtromısın jáne t.b bakterııaǵa qarsy preparattar bar. Oǵan qosa 25 myńǵa jýyq deksametazon jáne 30 myńǵa jýyq prednızolon preparattary bar. Qor kólemi 3 aıdan astam ýaqytqa jetedi dep josparlandy, – dedi ol.
Sondaı-aq óńirde medısınalyq uıymdarǵa jeke kásipkerler men kompanııalar demeýshiligimen О́JT (ókpeni jasandy tynystandyrý) apparattaryn alý jumystary toqtaǵan joq. Kópshilik jıylǵan jerlerge barmaý, betperde jáne antıseptık qoldaný syndy aldyn alý saqtyq sharalary turǵyndar arasynda turaqty nasıhattalyp keledi.
Maýsym aılarynda indet qaharyna mingen kezde aıaq astynan jedel uıymdastyrý jumystaryn júrgizip, oblystyq aýrýhanany tutastaı provızorlyq ortalyqqa aınaldyryp, apparat jetpeı daǵdarǵan, biraq qıyndyqqa shyńdala júrip qyzmet etken Mańǵystaý dárigerleri qolda bar múmkindikke saı daıyndyqtaryn pysyqtaýda.
Mańǵystaý oblysy