Premer-Mınıstrdiń orynbasary Eraly Toǵjanov balalardy qashyqtan oqytýdyń mańyzdylyǵyn túsindirdi, dep habarlaıdy Egemen.kz.
"Epıdemııalyq jaǵdaıdy eskere otyryp, balalardy qashyqtan oqytý qajettiligin taǵy da eskertemiz. Esterińizge sala keteıin, mamyr aıynda karantınnen keıin biraz balabaqshada kezekshi toptar ashyld. Artynsha Nur-Sultan qalasynda, Batys Qazaqstan oblysynda, biraz óńirde balalardyń arasynda koronavırýs tirkeldi. Sondyqtan qaýipsizdik máselesi eshqaıda ketken joq. Sonyń bárin eskerip otyrýymyz kerek. Koronavırýs indetiniń taralý tizbegi bir baladan bastap jalpy qoǵamǵa jetý múmkindigi óte joǵary. Ashyǵyn aıtqanda bala, synyp, mektep, odan ata-ana, ujym, qoǵam bolyp solaı jalǵasyp kete beredi", - dedi Eraly Toǵjanov.
Osy oraıda ol bul baǵytty Memleket basshysy qatań baqylap otyrǵanyn aıtyp ótti.
"Oqý prosesin jalǵastyrýdyń ár kezeńi jiti qaralyp, monıtorıng qorytyndylaryn saraptaý arqyly jasalyp otyr. Túsip jatqan árbir suraqqa shuǵyl túrde jaýap ta beriledi. Búgin áli de qashyqtan oqytý júıesine baılanysty másele de, suraqtar da joq emes. Alda atqarylar jumys ta kóp. Turaqty oqý júıesiniń tıimdiligi de, nátıjesi men sapasy da artyq ekeni belgili. Degenmen, balalarymyzdy aman saqtap qalý basty mindetimiz. Memleket tarapynan negizgi balalardyń densaýlyǵyn qamtamasyz etýge baılanysty naqty sharalardy qabyldaý sebebimiz de osydan shyǵyp otyr", - dedi ol.