Qazaqstanda 2020 jylǵa qaraı birinshi dárejeli avtojoldardyń kólemi 4 myń shaqyrymǵa deıin jetetin bolady
Bul týraly aldyńǵy kúni Kólik jáne kommýnıkasııa vıse-mınıstri Mereke Pishembaev Qazaqstan Respýblıkasy Prezıdenti janyndaǵy Ortalyq kommýnıkasııalar qyzmetindegi baspasóz máslıhatynda aıtty.
Qazaqstanda 2020 jylǵa qaraı birinshi dárejeli avtojoldardyń kólemi 4 myń shaqyrymǵa deıin jetetin bolady
Bul týraly aldyńǵy kúni Kólik jáne kommýnıkasııa vıse-mınıstri Mereke Pishembaev Qazaqstan Respýblıkasy Prezıdenti janyndaǵy Ortalyq kommýnıkasııalar qyzmetindegi baspasóz máslıhatynda aıtty.«Birinshiden, bizde qazir júktemesi kóp joldar barshylyq. Ondaılardy biz birinshi tehnıkalyq dárejege kóshiremiz. Bizdiń sol sanatqa engizilgen Astana–Býrabaı baǵytyndaǵy birinshi avtobanymyz 6 qatar beldeýlerden turady. Qazirgi statıstıkanyń ózi mundaı joldardaǵy apat sany ádettegi trassalarǵa qaraǵanda – 3, ólim oqıǵasynyń 22 ese az bolatynyn kórsetip berip otyr. Sondyqtan osy alǵan baǵytymyzdan aınymaı jáne qazirgi qarjylyq jaǵdaıymyzdyń buǵan múmkindik beretinin paıdalana kelip, ózimizdiń jol baǵdarlamamyzǵa sáıkes, 2020 jylǵa qaraı birinshi kategorııadaǵy joldar aýqymyn 4 myń shaqyrymǵa jetkizýdi josparlap otyrmyz», – dedi ol.
Vıse-mınıstr sondaı-aq qazirgi kezdegi jol-kólik oqıǵalarynyń aıtarlyqtaı aýqymdy bóligi jolda júrip kele jatqan kólikterdiń qarama-qarsy beldeýge shyǵyp ketýlerinen oryn alatynyna da nazar aýdaryp ótti. Onyń sózine qaraǵanda, jol boıynda tórt túlik túrlerimen soqtyǵysyp qalýdan bolyp jatatyn apattardyń da úles salmaǵy az emes.
«Osyǵan oraı, «Batys Eýropa – Batys Qytaı» halyqaralyq dáliziniń aýmaǵynda mal aıdap ótetin 160 ótkel jasaý kózdelgen. Buryn júrgizýshilerdiń tún kezinde trassa boıynda júrgen maldardy soǵyp ketý derekteri kóp bolatyn. Qazir biz bul problemany sheshtik», – dedi Pishembaev budan ári.
Vıse-mınıstr budan keıin ekinshi tehnıkalyq dárejedegi joldar sanatyna respýblıkalyq mańyzy bar 7 200 shaqyrymdyq jol bóliginiń kiretinin aıtyp ótti.
Serik PIRNAZAR,
«Egemen Qazaqstan».