Qazaqstan Respýblıkasynyń Ál-Farabı atyndaǵy ǵylym men tehnıka salasyndaǵy Memlekettik syılyǵyn taǵaıyndaý jónindegi komıssııanyń aldyn ala irikteýinen ótken «Ulttyq ǵylymı medısınalyq ortalyq» AQ ǵalymdarynyń «Klınıkalyq medısınada ınnovasııalyq jasýshalyq tehnologııalardy ázirleý jáne engizý» atty jumysy marapatqa laıyqty.
Sebebi mamandardyń qol jetkizgen ǵylymı nátıjeleri medısınanyń osy salasy boıynsha sátti júzege asyrylyp, ǵylymı-tehnıkalyq baǵdarlamalar negizinde eksperımenttik jáne klınıkalyq zertteýler arqyly ártúrli aýyr patologııalary bar naýqastarǵa joǵary tehnologııalyq medısınalyq kómek kórsetýge múmkindik berdi.
Bizdiń elde 2002 jyldan bastap alǵash ret jasýshalyq ınnovasııalyq tehnologııalar medısına ǵylymdarynyń doktory A.Q.Baıgenjınniń jetekshiligimen Ulttyq ǵylymı medısınalyq ortalyǵynyń qabyrǵasynda damı bastady.
Júrek-qan tamyrlary patologııasyn, qant dıabetin, aýtoımmýndy aýrýlardy jáne basqalardy emdeýdiń jańa tıimdi jasýshalyq tehnologııalaryn qurý, meniń oıymsha, «UǴMO» AQ qyzmetkerleriniń tamasha jetistigi bolyp tabylady jáne bul qazaqstandyq medısınalyq ǵylym men praktıkanyń damýyn jańa deńgeıge shyǵarady. Ult densaýlyǵyn saqtaý men nyǵaıtýǵa úles qosý jaıly Memleket basshysy Q.K.Toqaev óziniń Qazaqstan halqyna Joldaýynda da atap ótti.
Ortalyqtyń zertteý toby alǵash ret zamanaýı medısınanyń máselelerin sheshý úshin túrli kózderden jasýsha daqyldaryn aldy.
Ǵalym jáne dáriger retinde ortalyq patologııasy bar naýqastardy emdeýdiń joǵary tıimdi, ınnovasııalyq jasýshalyq tehnologııalaryn praktıkalyq densaýlyq saqtaýǵa qosqan úlesi negizinde ortalyqtyń ǵylymı-klınıkalyq qyzmetindegi nátıjelerdi joǵary baǵalaǵym keledi.
Májıt ShAIDAROV,
UǴA akademıgi, medısına ǵylymdarynyń doktory, professor, Qazaqstannyń eńbek sińirgen qaıratkeri