Nur-Sultan qalasynyń ákimi Altaı Kólginov elordadaǵy birqatar aýlalar men qoǵamdyq oryndardy abattandyrý jumystarymen tanysty.
«Aýqymdy jańǵyrtý jumystarymen aınalysyp jatyrmyz: apatty eski úılerdi súrip, qoljetimdi turǵyn úı, bilim berý, medısına nysandaryn, joldar men ınjenerlik jelilerdi (sý qubyry, elektr, káriz) salamyz. Qala aýdandaryn abattandyryp, kógaldandyramyz.
Keshkilik aralaý barysynda Saryarqa aýdanyndaǵy birqatar aýlalar men qoǵamdyq keńistikterdiń qurylys barysymen tanystym. Jeltoqsan, Esenberlın, Jangeldın, Seıfýllın kósheleri men Beıbitshilik dańǵyly bárine tanys. Bul kósheler qalanyń oń jaǵalaýynda ornalasqan. Erekshe atmosferasy bar. Aýdan jaıly bolýy úshin bos jerler, qaraýsyz qalǵan ýchaskeler, buzylǵan avarııalyq úılerdiń aýmaqtary abattandyrylyp, tartymdy oryndarǵa aınaldy.
Halyq sanynyń ósýin eskere otyryp, keń aýlalar, skverler men býlvarlar qurylysyna kóshtik. Halyq tyǵyz ornalasqan shaǵyn aýdandardy aýlalarmen, býlvarlarmen jáne alańdarmen qorshaımyz, ıaǵnı aýlalary jaqyn ornalasqan birneshe turǵyn úı keshenderin abattandyramyz.
Mysaly, Jeltoqsan kóshesindegi №2 úıdiń turǵyndary esep berý kezdesýinde aýlany abattandyrý máselesin kóterdi. Biz ony «qatysý bıýdjeti» baǵdarlamasy boıynsha abattandyrdyq. Turǵyndar aýdan ákimdikterine ótinim berip, aýla kórinisin usynady: qandaı aımaqtar salý qajet, qandaı sport alańy qajet jáne t.b. birqatar basqa másele sheshildi.
Esenberlın kóshesinde jattyǵý jáne oıyn alańdarynan basqa, basketbol men fýtbol oınaýǵa arnalǵan úlken alańdar ashyldy. Balalar ózderin kásibı fýtbolshylar men basketbolshylar sııaqty sezinedi.
Bıyl abattandyrylǵan aýla sany – 150, barlyǵy derlik paıdalanýǵa berildi. Onyń kópshiligi qalanyń eski bóliginde ornalasqan. Aralaý kezinde turǵyndarmen basqa da birqatar mańyzdy máselelerdi talqylaımyz, mysaly, «Qaýipsiz aýla» baǵdarlamasy boıynsha aýlaishilik aýmaqtarda kameralar ornatamyz. Bul qaýipsizdik deńgeıin arttyrady. Sonymen qatar jedel qyzmet mashınalary turǵyn úı aýmaǵyna kedergisiz kirý úshin «aqyldy shlagbaýmdar» atty jańa joba iske qosyldy», dep jazdy Altaı Kólginov áleýmettik jelidegi jeke paraqshasyna.